Plattdeutsche Nachrichten Plattdüütsche Narichten vun'n 19. September 2024

Libanon: Wedder technische Apparaten in de Luft flagen

Beirut: Dat twete Mal sünd in den Libanon technische Apparaten in de Luft flagen. Tominnst 20 Minschen sünd dorbi to Dode kamen. Dat seggt de Behörden dor. Mehr as 450 sünd to Schaden kamen. Düt Mal weren dat Funkgeräte, de in de Luft flagen sünd – woll ok wedder bi Lüüd, de bi de Terrorkoppel Hisbollah mitmaakt. Bi de eerste Reeg vun Anslääg weren ehrgüstern Pager explodeert. Ut den Libanon is to hören: Dorvun sünd de Krankenhüüs in’t Land övervull. Seggt warrt: Achter de Attack stickt de israelsche Geheemdeenst.

Water blifft böös hooch

Warschau: Dat Water steiht in en Reeg Staaten jümmers noch böös hooch. Dat gellt vör allen för Polen, Tschechien un Österriek. In enige Gegenden hebbt se al mit Oprümen anfungen, in annern schall dat Water noch anstiegen. De Präsidentin vun de EU-Kommischoon Ursula von der Leyen fohrt vundaag na Polen. In Breslau will se sik den Schaden ankieken. Snacken warrt se woll ok över Hölpsgeld vun de Europääsch Union.

ICE bi Langwedel twei: All Lüüd müssen rut

Langwedel: Rettungslüüd hebbt güstern Avend in den Kreis Veern all Lüüd ut en ICE ruthaalt. Kort vör den Bahnhoff Langwedel weer de stahnbleven. Sowat 200 Lüüd müssen ut de Bahn rut. Na een Stunn is en Behölpsbahn kamen. Wegen de Maleschen kunn twüschen Bremen un Hannover enige Stunnen lang keen Bahn mehr fohren.

Bremen un Neddersassen: Jeedeen twete junge Minsch is bi’n Kieferorthopäden

Hannover: Meist jeedeen twete junge Minsch in Bremen un Neddersassen warrt kieferorthopädisch behannelt – vele mit en Tähnspang. So steiht dat in en Unnersöken vun de Barmer Krankenkass binnen. Uttellt hebbt se Unnerlagen ut de Johren 2013 bet 2022. De Krankenkass bekriddelt: Düsse Behandlung kriegt kloor mehr Deerns as Jungs. Vun de Medizin her kunn een dor keen Klook rinkriegen, sä Heike Sander, Barmer-Geschäftsföhrerin in Neddersassen. Wat dor achter steken kunn: Vörbiller vun‘t Smuck-Ween oder dat jeedeen sien Rull in en Koppel söken deit.

Football Champions League: BVB hett de Nääs vörn

Brügge: In de Football Champions League hett Borussia Düörpm güstern Avend dat eerste Speel wunnen. Bi den belgischen Meister FC Brügge stünn dat an’t Enn 3:0. Vunavend mutt Meister Bayer Leverkusen bi Feyenoord Rotterdam ran, un RB Leipzig speelt bi Atletico Madrid.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven, Hüttenbusch un Leer överall 14 Graad. Vundaag: Eerst noch hoge Wulken, de de Sunn nich recht dörlaten wüllt. Dat blifft aver dröög. Gegen Middag kriggt de Sunn de Bavenhand, un denn warr dat hell un kloor. Blots süüdööstlich vun Bremen köönt Wulken opstiegen, un dor kann dat ok mal pladdern. Dat Thermometer krabbelt op 19 bet 24 Graad. De Wind dorto weiht flau oder en beten mehr vun de noordoosten Kant. Tokamen Nacht: Süüdlich vun Bremen kann dat eerst noch schuern. Achteran blots noch en poor Wulken oder gor kene. Dröög. An de See un de Elv kann sik bet to’n Morgen wedder hogen Daak utbillen. Bi 16 Graad op de Inseln, anners 14 bet 9 Graad. Morgen: Hell un fründlich mit Sunnschien. Blots an de See un de Elv blifft de hoge Daak noch en Tietlang stahn. Hier warrt dat eerst an’n Middag heller. An’n Namiddag un Avend lacht us överall de Sunn. Dat Ganze bi 20 bet 24 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Kück.