Plattdeutsche Nachrichten Plattdüütsche Narichten vun'n 07. Mai 2025

Bunnskanzler Merz reist na Frankriek un Polen

Berlin: De nee’e Bunnskanzler Friedrich Merz reist hüüt na Frankriek un Polen to’n Antrittsbesöök. Dor will he mit de Regerungsböversten ünner annern över den Krieg in de Ukraine un dat Thema Migratschoon snacken. Morgen will Merz mit US-Präsident Donald Trump telefoneern. Dat eerste Drapen vun dat nee’e Kabinett weer al güstern Avend. Dorbi güng dat um dat nee’e Verdelen vun Opgaven in de swatt-roden Bunnsregeern.

Indien fleegt Attacken op Ziele in Pakistaan

Islamabad: De ind’sche Luftwaap hett mehrere Ziele in Pakistaan angrepen. Na Angaven vun dat ind’sche Ministerium för’t Verdeffendeern is dorbi op de terrorist’sche Infrastruktur schaten worrn. Na Utkunft vun de pakistaan’sche Regeern sünd dorbi 26 Börgerslüüd to Dode kamen. Ind’sche Behörden mellt dorgegen acht Dode dör Schöten ut Pakistaan. Grund för de nee’en Spannungen twüschen de Atoommachten weer en Terroranslag in de Region Kaschmir.

Paapstwahl fangt an

Vatikaanstadt: Hüüt fangt de Wahl vun en nee’en Paapst an. Toeerst gifft dat en Mess in’n Petersdom. An’n Namiddag treckt sik de 133 Kardinalen in de Sixtin’sche Kapell trüch. Dor hebbt se so lang keen Kontakt to de Butenwelt, bet dat se en nee’en Paapst wählt hebbt. Den eersten Wahlgang schall dat noch hüüt geven. Darna stiggt Rook över de Sixtin’sche Kapell op. Wenn he witt is, is en nee’er Paapst wählt. Wenn de Rook swatt is, ward wieter söcht.

Volksbegehren gegen Dichtmaken vun’t Klinikum Links de Werser

Bremen: En Volksbegehren schall dorför sorgen, datt dat Klinikum Links de Werser wietermaken kann. An’t Enn vun’t Verfohren kann en Volksentscheed stahn, wenn de Politik de Plaans to’n Dichtmaken nich vörher trüchtreckt. De dat in Gang sett hebbt, hebbt na egen Angaven al mehr as 3000 Ünnerschriften för dat Volksbegehren sammelt. 5000 sünd nödig, dormit dat tolaten ward. De Bremer Senaat hett vör annerthalf Johr beslaten, dat Klinikum Links de Werser ut Kostengrünnen dichttomaken.

Gemeenden in Neddersassen rekent mit Millionen-Innahmen ut Windkraft

Hannover: Städer un Gemeenden in Neddersassen köönt mit Extra-Innahmen in Millionenhöögde ut de Windkraft reken. Denn in Tokunft kriggt se en Andeel vun dat, wat de Bedrievers innehmt. So süht dat en nee’et Gesetz vör. Dat Ümweltministerium in Neddersassen rekent mit Innahmen vun üm un bi negen Millionen Euro. Dat Geld schall för Sportverenen, Swömmbaden un den Verkehr vun dichtbi bruukt warrn.

Dat Weer

Un nu en Blick op dat Weer: In Cloppenborg 10, in Leer 11, in Bremen 12, un in Bremerhaben sünd dat opstünns 13 Graad. Hüüt gifft dat en Wessel ut Sünnschien un Wulken, de mal locker, mal degter ween köönt. Enkelte Drupen kann dat ok geven, meisttiets schient aver de Sünn, besünners in Oostfreesland. Dat Thermometer stiggt an’n Namiddag op 13 Graad op de Eilannen un 15 bet 18 Graad in’t Binnenland. In de Nacht is dat eerst wulkig, Maand un Steerns sünd blots kort to sehen. Later lockert de Wulken vun de Elv her op. Bet to’n Morgen is de Heben licht wulkig oder klaar bi 9 Graad op de Eilannen un 6 bet 2 Graad op’t Fastland. Morgen schient eerst faken de Sünn. Bet to’n Namiddag kaamt jümmer mehr opstiegen Wulken dorto, de sik an’n Avend ok mal vör de Sünn schuuvt. Regen gifft dat aver nich bi 14 Graad op de Eilannen un 16 bet 18 Graad in’t Binnenland.

Dat weern de Narichten op platt. Tohoopstellt hett se Michael Kück. Op Platt trechtmaakt un vörleest vun Marc Gelhart.