Plattdeutsche Nachrichten Plattdüütsche Narichten vun'n 8. Mai 2025

Wahl vun en Paapst löppt wieder

Rom: In den Vatikaan söökt se wieder na den Böversten vun de kathoolsche Kark. De 133 Kardinaals, de mitwählen dröfft, sünd vunmorgen in de Sixtinsche Kapell tohoopkamen, mit keen Kuntakt na buten. Vundaag schüllt se bet veermal afstimmen. An den eersten Dag vun dat Tosamenkamen harrn se güstern noch keen neen Paapst funnen. An’n Avend weer swatten Rook ut den Schosteen över de Sixtinsche Kapell opstegen.

Düütschland denkt an dat Enn vun den Tweten Weltkrieg

Berlin: Düütschland denkt vundaag doran, dat dat 80 Johr her is, dat de Twete Weltkrieg to’n Enn kamen is un dat dat Land vun de Nazi-Gewalt freekamen is. Bunnspräsident Frank-Walther Steinmeier un Kanzler Friedrich Merz warrt in de Nee Wacht in Berlin en Kranz daalleggen. An’n Middag löppt in den Bunnsdag en Gedenkfier. In Bremen gifft dat an’n Avend en Fierstunn in de Börgerschap. In Bremerhaven maakt se Klock fief en Fierstunn an dat Mahnmaal an de Grote Kark.

Binnenutschuss vun den Landdag in Neddersassen snackt över de Saak Lorenz

Hannover: Dat de Polizei in Ollenburg Lorenz vun 21 Johr dootschaten hett, doröver snackt jüst de Binnenutschuss vun den Landdag in Hannover. Polizeipräsident Axel Brockmann gifft Bericht över dat, wat se bet nu rutfunnen hebbt. Rutkriegen wüllt se vör allen: Wat hett den Schandarm dorto brocht, dat he schaten hett. Un: Speelt womööglich strukturellen Rassismus en Rull.

Fohrgastschipp sitt över Stunnen op Damm bi Harlesiel fast

Wittmund: In de Noordsee vör Harlesiel is güstern en Fohrgastschipp op en Damm opfohrt un goot negen Stunnen lang dor nich wedder freekamen. De Boord-Elektronik weer utfullen. Private Hölpslüüd hebbt en poor vun de 15 Passageren an Land bringen kunnt. De annern müssen jüst as de Kru an Boord blieven, bet de näächste Floot oplopen weer. Eerst an’n Avend kort vör acht kunn dat Schipp wedder in Harlesiel fastmaken.

Kultusministersch tekent plattdüütsche Scholen ut

Hannover: Neddersassens Kultusministersch Julia Willie Hamburg hett noch mal wedder teihn Scholen as „Plattdüütsche School“ oder „Saterfreesche School“ uttekent. Mit dorbi sünd Grundscholen ut de Landkreisen Auerk, Cloppenborg, Wittmund, Wersermasch un in Emm. Den Ehrenpries gifft dat siet 2014. He geiht an Scholen, de sik afsünnerlich för de Region un de Spraken Plattdüütsch un Saterfreesch insett hebbt. Tohoop sünd dat nu 46 Scholen, de den Ehrenpries kregen hebbt.

Dat Weer

Un woans süht dat mit dat Weer umto ut? Opstunns hebbt wi in Bremen 12 Graad, in Bremerhaven, Cuxhaven un Kneten sünd dat 13 Graad. Vundaag: veel Sunnschien mit blots en ganz poor Wulken. Bet to’n Namiddag stiegt mehr un mehr Wulken op, un de köönt sik gegen Avend ok mal vör de Sunn schuven. Dat blifft aver dröög. Dat Thermometer krabbelt op 14 bet 18 Graad. De Wind dorto weiht flau oder en beten mehr, in Böen ok frisch, vun de noordoosten Kant. Tokamen Nacht: De Wulken lööst sik op. Dat geiht an de Küst gauer as in’t Binnenland. Överall blifft dat dröög. Bi 10 bet 1 Graad. Fredag staht blots noch en Handvull Restwulken an’n Heven. De Sunn lacht, man dorvun stiegt ok wedder Wulken op. An’n Namiddag köönt de ok wat grötter warrn, man dat blifft hell un kloor, vör allen na de See to. Bi 14 bet 19 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jem Irene Lottes.