Plattdeutsche Nachrichten Plattdüütsche Narichten vun'n 9. Mai 2025

Bremens Borgermester graleert Paapst Leo XIV.

Rom: Vun överall op de Welt graleert de Minschen den neen Paapst Leo XIV. He is de eerste US-Amerikaner in düt Amt. Ok Bunnskanzler Friedrich Merz, Bunnspräsident Frank-Walther Steinmeier un UN-Generaalsekretär Antonio Guterres freit sik mit den Böversten vun de kathoolsche Kark. Bremens Borgermester un Karkensenater Andreas Bovenschulte hett ok graleert un schreven, he frei sik, dat de ne’e Paapst anstöten will, dat de Minschen mehr mit’nanner snackt, ok över Grenzen weg, över Kulturen un jemehr Sichten op de Welt.

Kanzler Merz kummt in Brüssel mit Top-Lüüd vun EU un NATO tohoop

Brüssel: Bunnskanzler Friedrich Merz is to sien eersten Amtsbesöök bi de EU un de NATO ankamen. Dree Daag na sien Wahl is dat dat twete Mal, dat de ne’e Kanzler na’t Butenland reist. Snacken will he mit de Präsidentin vun de EU-Kommischoon Ursula von der Leyen, EU-Raatspräsident Antonio Costa un Nato-Generaalsekretär Mark Rutte. Dat geiht vör allen üm Russlands Överfall op de Ukraine un wo goot dat Nato-Militär opstellt is.

In Moskau un Kiew: Trüchdenken an dat Enn vun den Krieg

Moskau: In Russlands Hauptstadt löppt de Militär-Opmarsch, de dor op wiest, dat de Twete Weltkrieg vör 80 Johren to Enn kamen is. As een vun de Ehrengäst is ok Chinas Staats-Baas Xi dor mit bi. Dat is de veerte Opmarsch mit Dusende Suldaten un grote Militärtechnik op den Roden Platz, sietdat Russland de Unkraine angrepen hett. Kiew seggt, dat is nix anners as en böösoortige Wies, de Muskeln spelen to laten. Europa wiest sien Steed an de Siet vun Kiew dormit, dat de EU-Butenministers in Lwiw in de westliche Ukraine tohoopkaamt. Ok de ne’e düütsche Butenminister Johann Wadephul is dor mit bi.

Bremen plaant den Afloop vun de Lehrplattform „itslearning“

Bremen: De Lehrplattform för Scholen „itslearning“ schall nee opboot warrn. Bet Enn 2026 schall dat Online-Programm eenfacher to bruken ween, un dat vör allen för Grundschölers. Dat hett de Bremer Bildungsbehöörd anseggt. Op de Plattform hoochladen köönt Mesters Unnerrichtsvörlagen un Kinner jemehr Huusopgaven. Bremen plaant den Nee-Opbo ok för de annern Bunnslänner, bi de „itslearning“ al löppt – dat sünd Berlin, Mecklenborg-Vörpommern un Schleswig-Holsteen.

Testloop för dat Inlagern vun Watergas in Etzel

Friedborg: In den Soltstock Etzel in Oostfreesland fangt se jüst mit den neechsten Test-Stapp dorför an, dat se in de Höhlen dor Watergas inlagern wüllt. De Bedriever Storag pumpt vun hüüt op an 45 Tonnen Watergas in en Höhl rin. Ok fangt se an, över de Eer en Anlaag optoboen, mit de se Watergas vun een Lagersteed in en anner umpumpen köönt. Mit dorbi sünd vundaag ok Neddersassens Wirtschaftsminister Olaf Lies un Umweltminister Christian Meyer. Dat se dor Watergas inlagert, höört to de Energiewenn mit to. Bet nu verwohrt se dor blots Eerdgas un Eerdööl.

Dat Weer

Un woans süht dat mit dat Weer umto ut? Opstunns hebbt wi in Deefholt 12 Graad, in Bremerhaven un Staad sünd dat 14 un in Bremen 15 Graad. Vundaag: An’n Vörmiddag Sunnschien satt. Vun Middag op an stiegt in’t Binnenland Wulken op, de sik laterhen ok vör de Sunn schuven köönt. Dat blifft aver dröög. Dat Thermometer krabbelt op 13 bet 16 Graad an de See un 19 bet 20 Graad in’t Binnenland. De Wind dorto weiht flau vun de noorden Kant, an de See ok en beten mehr. Tokamen Nacht kriegt wi de Steerns to sehn, mit en poor lockere Wulken na de Elv to. Dröög. Gegen Morgen kann vun’t nöördliche Emsland över Bremen un umto bet na de Lümborger Heid Daak optrecken. Bi 9 bet 7 Graad an de See un 5 bet 3 Graad in’t Binnenland. Morgen: Wenn sik de letzte Daak oplööst hett: Veel Sunnschien. Ööstlich vun de Werser mit en poor mehr Wulken. Man ok hier blifft dat hell un dröög. Bi 13 bet 20 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jem Gabriele Intemann.