Plattdeutsche Nachrichten Plattdüütsche Narichten vun'n 25. April 2025

Twischen Indien un Pakistan warrt dat kribbelig

Neu Dehli: Twischen Indien un Pakistan warrt dat wieder kribbelig, na de Terror-Attack in Kaschmir mit 26 Doden. Indische un pakistan`sche Suldaten hebbt sik in de Nacht , in de Region Kaschmir, beschaten, so een pakistan`sche Vertredder vun de Regeerung. Dorvör harrn beide Länner dat Utwiesen vun Staatsbörgern, jeweils vun de annern Siet anordnet. Indien geiht dorvun ut, datt de Attack ok mit op de Reken vun dat Naverland geiht. Man Pakistan wiest dat torüch.

Ukrain`sche Botschafter bekrittelt Gedenkfier vun`t Enn vun Weltkrieg in Sassen

Torgau: In de Stadt in Sassen besinnt man sik hütt doran, wat dor vör 80 Johren, an´t Enn vun´t Tweeten Weltkrieg, passert is. Dor sünd op de Brügg, de twei wesen is, US-Suldaten un sowjetische Suldaten upnanner dropen. De “Handslag vun Torgau” is dat Symbol för dat Enn vun de Nazi-Heerskupp. Ok de russ`sche Bootschafter will to de Gedenkfier kamen. Dat bekrittelt de ukrain`sche Botschafter in Berlin.

Koalition in Bremen kabbelt sik över „Horner Spitz“

Bremen: Binnen de rood-grön-roode Koalition in Bremen gifft dat düchtig Striet üm dat plaante grötter maken vun den Technologiepark an de Universität. De Grönen hebbt sik nu dorgegen utspraken. Se willt nich, dat man ut de 6 Hektar Gröönflachen, een Flachen mit Geschäften maakt. Dorbi is de Plaan vun dat Projekt „Horner Spitz“ een Deel vun den Koalituionsverdrag. Senatorin för Wirtschaft Kristina Vogt vun de Linken snackt vun een „Affront“ vun de Grönen, un vun eene  eensiedige Opkünnigung vun den Koalitionsverdrag. Se rekent dormit, dat man de Plaans för den Technologiepark ümsett. Hütt geiht een Akktionsbündnis vun de Börgerschaft, gegen dat Ümsetten vun den Bo, vun de Horner Spitz, op de Straat.

Dat tweede LNG-Terminal kummt na Wilhelmshaben

Wilhelmshaben: In Wilhelmshaben kummt in de tokomen Dage de tweede LNG-Terminal, de swimmt, an un maakt dor fast. De Excelsior maakt ehre Leitungen nich mit Chlor rein, sünnern mit Ultraschall. Ümrüst hett dat Schipp de Kieler Anti-Foulding-Spezialist Hasytec. Üm dat ok de Swienswaale per Ultraschall snackt, nehmt se annere Frequenzen, dormit de Deerter keenen Schaden nehmt. De Testloop dorför, de 6 Maand duert hett, is positiv aflopen, so seggt dat Ünnernehmen. Man een Afsluss-Ünnersöken steiht noch ut.

Ollenborg rekent mit Demo na Scheeten vun een Polizisten op 21-Jöhrigen, de doran sturven is

Ollenborg: Na dat Polizei-Scheeten op een 21-Jöhrigen, de dordör sturven is, is hütt een op de Straat gahn op den Peermarkt plaant. De Stadt rekent mit an de 5.000 Minschen. Ok Koppels vun annere Regionen willt anriesen. De Minschen willt tosamen truern un an den jungen Mann Lorenz A. , de to Dode kamen is, erinnern. Se verlangt aver ok, dat man den Fall nipp un nau op den Grund geiht. Bi dat Ünnersöken vun de Liek is ruutkamen, dat man em vun achtern dropen hett.

Dat Weer

Un nu een Blick op dat Weer: in Bremen 6, in Nenborg, in Brinkum un in Bremerhaben sünd dat opstünns 7 Graad. Hütt geiht de Dag gries un mit veel Nevel los. Vun Middag an wesselt sik den de Sünn un de Wulken af. An de Küst kriegt wie de Sünn ok mal länger to sehn, dat blifft meist dröge, bi 11 bit 17 Graad. Tokamen Nacht lööst sik de luckeren Wulken up un treckt na Westen, de Heven is klar, bi 7 bit 2 Graad. Morrn fangt de Dag mit veel Sünnenschien an. De Nevel lööst sik flink up. Vun Middag an treckt een paar luckere Wulken an den Heven, man de Sünn lacht us jümmer wedder an un dat blifft dröge. De Temperaturen liggt bi 14 bit 20 Graad.  Sünndag veel Sünn, blots twischen Ems un Weser een paar Wulken, man dor kummt nix vun baven rünner, bi 14 bit 20 Graad. Dat weren de Narichten op Platt. Tohoopstellt hett se Gabriele Intemann. Trechtmaakt un vörleest vun Antje Kruppa.