Plattdeutsche Nachrichten Plattdüütsche Narichten vun'n 8. April 2025

Kukies rekent mit starke Maleschen för Düütschland wegen Tollstriet

Berlin: De geschäftsföhrende Bunnsfinanzminister Jörg Kukies rekent dormit, datt dat düütsche Exportgeschäft stark ünner de US-Töll lieden ward. Wenn dat bi de Opslääg blifft, kunn dat Utföhren in de USA üm bet to 15 Perzent daalgahn, as de SPD-Politiker in’t ZDF säe. Dat will he vun Bereknungen vun dat ifo-Institut weten. To glieke Tiet stiggt de Gefohr vun en wackelige Wirtschaft. In düssen Tollstriet gifft dat keen Gewinner, säe Kukies.

Copernicus mellt warmsten Määrz in Europa

Bonn: De Temperaturen in’n Määrz weern in Europa so hooch as noch nie nich. Dat mellt de EU Klimadeenst Copernicus. So leeg de Temperatur in’n Snitt bi üm un bi 6 Graad Celcius, un dormit meist 2,4 Graad över dat Määrz-Middel in de Johren 1991 bet 2020. In Zentraaleuropa, ünner annern in Düütschland, weer de Määrz bavento bannig dröög.

Bremens Börgermeister Bovenschulte besöcht Istanbul

Istanbul: Bremens Börgermeister Andreas Bovenschulte reist hüüt to en Termin vun de Düütsch-Törkschen Städerpartnerschaftskonferenz. In Istanbul ward he sik mit sien Amtskollegen ut Izmir drapen. Bremen un Izmir sünd siet 30 Johr in en Städerpartnerschaft tosamen. Bovenschulte will mit sien Besöök aver ok en Teken vun Tohoopstahn mit de Kräften vun de kommunalen Demokratie in de Törkei setten.

Zentraalraat vun de Juden hollt Deichbrand Festival för nich seker

Cuxhaben: De Zentraalraat vun de Juden hett vör dat Besöken vun dat Deichbrand-Musikfestival wohrschaut. Grund dorför is de plaante Optritt vun’n US-Rapper Macklemore. De Dackverband vun de Jüüdschen Gemeenden smitt em Antisemitismus vör. De Deichbrand-Veranstalters seggt, datt dat nich stimmt un se Diskrimineern nich tolereern ward. De Präsident vun’n Landsverband vun de Jüüd’schen Gemeenden in Neddersassen, Michael Fürst, hett in’n NDR dorvör wohrschaut, de Besökers vun’t Festival as Antisemiten to beschimpen.

Programm to’n Internatschonalen Dag vun de Roma in Bremen

Bremen: Dat Stadtbökerhuus un dat Kommunaalkino City 46 in Bremen wiest vun hüüt an noch mal op dat Verfolgen un Diskrimineern vun Sinti un Roma hen. Grund dorför is de internatschonale Dag vun de Roma. Plaant hett de Veranstaltungsreeg över veer Daag de Verband vun Düütschen Sinti un Roma in Bremen. Ünner annern ward Dokumentaarfilme ut Düütschland un Öösterriek wiest. Bavento gifft dat an’n Dünnersdag en Lesung mit Musik.

Dat Weer

Un nu en Blick op dat Weer: In Bremen un Möppen 4, in Bremerhaben 6, un in Cuxhaben sünd dat opstünns 8 Graad. Hüüt Vörmiddag löst sik de letzten Feller mit Daak op un dat ward fründlich. An’n Namiddag un Avend schient in’t Werser-Ems-Flach blangen en poor lockere Wulken för längere Tiet de Sünn. Oosten de Werser gifft dat twars mehr Wulken, aver ok veel Sünnschien. Op de Eilannen un an de Küst kladdert dat Thermometer op 9 bet 10 Graad, in’t Binnenland op 13 bet 15 Graad. In de Nacht is dat eerst deels dicht wulkig, deels klaar un dröög. Later breedt sik vun de Küst dichte Feller mit Daak un hogen Daak ut, de aver hööchstens enkelte Druppen bringt. Dorto Temperaturen vun 6 bet 5 Graad an de Küst un 2 bet 1 Graad in’t Binnenland. Morgen is dat an de Noordsee gries mit hogen Daak un 8 bet 9 Graad. In’t Binnenland geiht dat eerst deels mit Daak, deels fründlich un dröög in den Dag, later gifft dat en Mix ut Sünnschien un Wulken bi 12 bet 13 Graad.

Dat weern de Narichten op platt. Tohoopstellt hett se Irene Lottes. Op Platt trechtmaakt un vörleest vun Marc Gelhart.