Plattdeutsche Nachrichten Plattdüütsche Narichten vun'n 23. April 2025

Dode Paapst Franziskus in´n Petersdom opböhrt

Rom. Die Liek vun Paapst Franziskus is in den Petersdom in Rom opböhrt wurren. Dor köönt sick Glövige den vun em verafscheden. De Truerfier finnt den an´n Sünnavend op den Petersplatz statt. Dorna warrt de Paapst in de Basilika Santa Maria Maggiore buten vun den Vatikan to Graff leggt.

Russ´sch Geheemdeenst hett woll Schuld an de Luftfrachtbrandgranaten

Köln. En russ´sch Geheemdeenst is woll Schuld för en Reeg vun Brandgranaten in de Luftfracht. Dat vermoden europäisch Sekerheitsbehörden. Na Naforschens vun WDR, NDR un de Süüddüütschen Zeitung wurren vun thein Lüüd, vun de se meent, de dat doon hebben schüllt, de Naam rutfunnen. De Lüüd wurren över Narichtendeenste vun Russland anworven. De Paketbrandgranaten weern verleden Sommer in Frachtzentren in Leipzig, Birmingham un bi Warschau in de Luft gahn.

Doods-Polizeischööt in Ollenborg draapt Opfer vun achtern

Olleborg. De in Ollenborg dör Polizeischööt dootscheten 21 Johr old Mann is vun alltohoop veer Schööt drapen wurren. Dat is bi de Obdukschoon rutkamen. Dree Schööt dropen den Mann vun achtern. So steiht dat in dat Resultat vun de Obdukschoon. De Mann is in´t Krankenhuus an sien Wunnen sturven. De Staatsafkaatschop Ollenborg geiht de Saak wegen Dootslag gegen de Polizisten, de dat weern, na. Dat is is en normale Vörgang.

Jusos ut Bremen bekritteln Koalitschonsverdrag

Bremen. In de SPD vun Bremen gifft dat Gegenwind an den uthanneln Koalitschonsverdrag mit de Union in den Bund. Dat is an´n Avend op en Parteikonferenz düütlich wurren. Wind vun vörn geev dat vör allen vun de Jusos. De Börgermeister vun Bremen Andreas Bovenschulte dorgegen harr sick wedder för den Koalitschonsverdrag utspraken.

Werder-Störmer Burke steiht woll vör Wessel

Bremen. Werder-Bremen-Störmer Oliver Burke steiht as dat lett vör en Wessel to´n eersten FC Union Berlin. Dat hett dat Portal Diekstuuv mellt. Dorna hett de 28 Johr old Schott güstern al den Medizintest bi den Hauptstadt-Club makt. De Verdrag vun Burke bi Werder löppt na düsse Speeltiet ut.

Dat Weer

Un nu noch en Blick op dat Weer: In Weiherbarg acht, in Bremen-Mitt un in Bremerhaben negen un in Hooksiel sünd dat opstunns thein Graad. Vundag fangt dat mit velen Wulken an. In´n Verloop hett de Sünn dat nich licht dör de dichten Wulken to kieken. Af un an is ok mal en Regenschuer ünnerwegens. Dat kann ok reell pladdern mit Blitz un Donnerslag. An de Küst blifft dat dröög. De Wind weiht en beten vun de oosten Kant. Op dat Thermometer sünd 13 bit 17 Graad to lesen. In de Nacht kann man nich de Sterns sehn, wiel överall Wulken sünd. Hier un dor regent dat. In Richt Elv blifft dat dröög. Söven bit thein Graad stahn op dat Thermometer. Morn sünd vele Wulken an´n Heven un in dat Weser-Ems-Landstück kamt dat jümmer wedder natt vun baven. An´n Namiddag treckt de Regen af un dat warrt hell un kloor. Dat Thermometer wiest elven bit 17 Graad.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Markus Weise.