Plattdeutsche Nachrichten Plattdüütsche Narichten vun'n 14. April 2025

Selenskyj fordert Trump to en Besöök in de Ukraine op

Kiew: De ukrainsche Präsident Wolodymyr Selenskyj hett US-Präsident Donald Trump opfordert, sik sülbens en Bild dorvun to maken, wat de Russen allens twei maakt hebbt. Bi dat Angrepen vun de Stadt Sumy mit Raketen sünd an’n Sünndag 34 Minschen ümbröcht un 117 wietere versehrt worrn. Kanzler Olaf Scholz un Frankrieks Präsident Emmanuel Macron hebbt dat Angrepen düchtig beklaagt. Trump dorgegen hett verklaart, datt em seggt worrn is, datt sik dat bi de russ’sche Attack üm en Versehen hannelt hett.

Merz stellt Ukraine Levern vun Taurus in Utsicht

Berlin: Friedrich Merz, de wohrschienlich de tokamen Kanzler ward, hett de Ukraine dat Levern vun Taurus-Marschfleegbomben in Utsicht stellt. Dat Levern mutt mit de europääschen Partners afstimmt warrn, un wenn dor tostimmt ward, denn schall Düütschland wat dortogeven, säe Merz in de ARD-Sendung „Caren Miosga“. De ukrainsche Armee mutt ut de Afwehr rutkamen, so Merz. De russ’sche Attack mit Raketen op de Stadt Sumy betekent he as sworet Kriegsverbreken.

Merz will weniger as 100.000 Asylbewarvers in’t Johr

Berlin: Bi Caren Miosga hett Friedrich Merz ok künnig maakt, datt he de Tall vun nee’e Asylbewarvers op ünner 100.000 in’t Johr drücken will. Städer, Gemeenden, Scholen, Krankenhüüs un de Infrastruktur kaamt dor middewiel nich mehr mit trecht. In’t verleden Johr hebbt meist 230.000 Minschen to’n eersten Mal in Düütschland en Andrag op Asyl stellt. Dat weern al üm un bi 100.000 weniger as in’t Johr tovör.

Arbeitsminister Heil dringt op 15 Euro Minnstlohn

Berlin: Bunnsarbeitsminister Hubertus Heil will nich vun en Minnstlohn vun 15 Euro in’t tokamen Johr afgahn. Se hebbt woll bi dat Koalitschoonsverhanneln bespraken, datt se dat henkriegen wüllt, säe Heil in’t „Morgenmagazin“ vun’t ZDF. Wichtig is, datt de Minschen, de düchtig arbeidt, dorvun ok leven köönt, so Heil. Tovör hett CDU-Baas Merz för Unroh sörgt, as he seggt hett, datt de Minnstlohn vun 15 Euro för’t tokamen Johr nich wiss is.

SPD maakt sik trecht för Afstimmen över Koalitschoonsverdrag

Hannover: De Koalitschoonsverdrag mit CDU un CSU op Bunnsebene is ok Thema bi de SPD-Liddmaten in Bremen un Neddersassen. In Hannover gifft dat an’n Avend en Dialogkonferenz, bi de de Parteivörsitters Saskia Esken un Lars Klingbeil för de swatt-rode Koalitschoon warven wüllt. In Bremerhaben un Bremen sünd twee Veranstalten plaant, bi de sik de Liddmaten uttuuschen köönt. Vun morgen an köönt de meist 360.000 SPD-Liddmaten över den Koalitschoonsverdrag afstimmen.  

Dat Weer

Un nu en Blick op dat Weer: In Möppen 9, in Leer 10, in Bremerhaben 11, un in Bremen sünd dat opstünns 12 Graad. Hüüt gifft dat mal Sünnschien, mal Wulken. Besünners an’n Vörmiddag sünd enkelte Schuers ünnerwegens, ehrdat de Namiddag wietgahns dröög blifft. Dat Thermometer stiggt op 13 Graad op de Eilannen un 16 bet 19 Graad in’t Binnenland. In de Nacht funkelt de Steerns för längere Tiet, un dat blifft dröög. Dorbi sünd blots lockere Wulkenfeller ünnerwegens. Dorto Temperaturen vun 10 bet 7 Graad. Morgen gifft dat eerst en Wessel ut Sünn un Wulken, un dat blifft meisttiets dröög. Bet to’n Avend ward de Wulken ut Süüdwesten dichter, un besünners in’t Emsland un Oostfreesland kaamt Schuers un villicht ok korte Gewidder op. In’t Binnenland wiest dat Thermometer 20 bet 23 Graad, op de Eilannen 17 bet 18 Graad.

Dat weern de Narichten op platt. Tohoopstellt hett se Sven Weingärtner. Op Platt trechtmaakt un vörleest vun Marc Gelhart.