Plattdeutsche Nachrichten Plattdüütsche Narichten vun'n 10. April 2025

Koalitschoonsverdrag kriggt Loff un warrt bekriddelt

Berlin: Verbänn un Organisatschoon beweert den vun Union un SPD uthannelt Koalitschoonsverdrag ünnerscheedlich. Gewarkschoppen sünd tofreden dormit, dat de Rentenhööchde seker blieven schall. Ümweltverbänn sünd dorgegen bang vör Schreed torüch bi den Klimaschuul. De Weertschop heet de Verlichten för Ünnernehmen goot. Bremens Börgermeester Andreas Bovenschulte see dat is en Kompromiss, de sik sehen laten kann.

CSU stimmt hüüt över den Koalitschoonsverdrag af

Berlin: As eerste tokamen Regeernspartei will de CSU hüüt över den uthannelt Koalitschoonsverdrag afstimmen. De Böversten vun de Partei schüllt en Votum afgeven. Wat dorbi rutsuert will Parteibaas Markus Söder denn an fröhen Namiddag künnig maken. Bi de SPD warrt vun tokamen Week af an de goot 360.000 Parteiliddmaten fraagt – bi de CDU besluut Enn April en lütt Parteidag.

Trump gifft velen Lännern en Tollpaus

Washington: De US-Regeern will in de tokamen Weken mit verbünnt Lännern över en Tollafkamen snacken. Na dat Finanzministerium sünd Drepen mit över 70 Staaten plaant. US-Präsident Donald Trump harr güstern en Paus vun de anornt Töll künnig maakt. In de tokamen dree Maand gellt dormit för veel Länner – Utnahm is China – en Satz vun 10 Perzent för Import in de USA. Düsse Ümkehr Trumps harr för en düütlich Plus an den US-Börsen sorgt.

Arbeiden an den A 281-Wersertunnel in Bremen sünd in den Tietplaan

Bremen: De Arbeiden an de Grootbosteed an den Wersertunnel, de
A 281, liggt in den Tietplaan. Dat hett de tostännig Projektsellschop DEGES mellt. Dormit dat ok so blifft, schall in Bremen-Seehuusen in Sommer de wichtigst Straat för den Oortsdeel – de Hasenbürener Landstraat – verleggt warrn. Mit dat Torechtmaken dorför fangt de Bofirma in de tokamen Weken an. De Wersertunnel twuschen Seehuusen un dat Stahlwark schall Enn 2029 den Autobahnkrink rund umto Bremen kumplett maken.

Aktivisten protesteern gegen Elon Musk in Ollenborg

Ollenborg: In de Ollenborger Binnenstadt hebbt güstern Avend rund 20 Aktivisten gegen Elon Musk un Tesla protesteert. Twee dorvun hebbt sik mit en Banner an de Amalienbrüch över de Hunte afseilt. Dorför hett dat Waterstraaten- un Schippfohrtsamt den Deel för twee Stünnen dicht maakt. Tominns een Binnenschipp kunnt dorüm nich wiederfohren, see de Polizei.

Dat Weer

Un nu kiekt wi op dat Weer: In Bremen, Bremerhoben, Möppen un Emm sünd dat opstunns överall acht Graad. Hüüt blifft dat övern Vörmiddag meist gries an Namiddag schafft de Sünn dat den aver doch bi negen bet ölven Graad rund um de Küst un darteihn bet veerteihn Graad in´t Binnenland. In de Nacht sünd wenig Wulken an Heven, de Nordsee schickt us hoogen Daak und dat kann en poor Druppen geven. Dat Thermometer wiest us söven bet veer Graad. Morgen gifft dat vun dat Elv-Werser-Dreeeck bet na dat Ole Land mehr Wulken as Sünn, aver woll kien Regen. Süüdwestlich dorvun lööst sik de hooge Daak gau op un de Sünn lacht blangenbi lütte Wulken un dat bi fofteihn bet achteihn Graad, an de Küst weiht en Seewind dorum warrt dat dor blots ölven bet veerteihn Graad.

Dat weren de Plattdüütschen Narichten. Tohoopstellt vun Anja Guse. Op platt torechtmaakt un vörleest vun Martina Brünjes.