Plattdeutsche Nachrichten Plattdüütsche Narichten vun'n 17. April 2025

Merz: Sommerferien vun den Bunnsdag schüllt körter warrn

Berlin: Friedrich Merz, he warrt woll de ne’e Bunnskanzler, will de Sommerferien bi den Bunnsdag körter maken. He bruukt de Tiet, wenn he Anfang Mai de Regerung övernahmen hett, dat he gau wat op de Been stellen kann, sä he an de Blääd vun de Funke Mediengrupp. Dat geiht um strengere Kuntrullen an de Grenzen un dat Lüüd, de keen Anrecht hebbt, trüchschickt warrt, dat geiht um weniger Bürokratie un um de Aktivrente. Union un SPD hebbt in den Koalitschoons-Kuntrakt fastleggt: Rentners köönt bet 2000 Euro den Maand dortoverdenen. De Bunnsdag schull egens den 7. Juli dat letzte Mal tohoopkamen.

Kalifornien klaagt gegen Trump sien Toll

Sacramento: De Regerung vun den Bunnsstaat Kalifornien hett gegen den Extra-Toll vun US-Präsident Donald Trump klaagt. Gouverneur Gavon Newsom un Generaal-Staatsavkaat Rob Bonta seggt: De Präsident dröfft gor keen ne’en Toll ansetten. Na de US-Verfaten kann blots de Kongress regeln, wat an Toll fastsett warrt – un nich de Präsident. Vun den Toll markt se in Kalifornien afsünnerlich veel, wo doch de meisten Woren ut China över kalifornsche Havens na’t Land rinkaamt. Kalifornien is ok Technologie- un Buern-Land.

Plaan-Teeknungen för dat Karstadt-Flach in Bremerhaven kaamt op’n Disch

Bremerhaven: De Stadt stellt an’n Middag en Unnersöken vör to dat, wat vun dat fröhere Karstadt-Flach warrn schall. Op de Teeknungen is op, woans en Neeboo dor utsehn kunn. Ok wüllt se rutkriegen, wat ole Stücken vun dat Huus ut de 1950er Johren stahn blieven köönt. Bremerhaven plaant op dat Flach in de Binnenstadt en Jugend-Harbarg un en ne’e Bibliothek. Un denn schall dat mööglich warrn, dat een vun de Binnenstadt na de „Havenwelten“ henkieken kann.

Bremen: Nich mehr so strenge Regeln för Füerwehr-Lüüd?

Bremen: Binnensenater Mäurer will gegen Middag in’t Raathuus 15 ne’e Lüüd för de Bremer Füerwehr den Eed afnehmen. Dorbi sünd ok 12 Uttobildende, de Brandmeister warrn wüllt. Wenn dat na dat Binnenressort geiht, mööt Lüüd, de bi de Füerwehr anfangen wüllt, nich mehr so veel mitbringen. Bet nu köönt sik blots so’n Lüüd mellen, de al in en Profeschoon utbillt sünd. Nu denkt se doröver na, dat sik junge Lüüd ok glieks na de School mellen köönt.

Mehr Minschen in’n Sport-Vereen

Hannover: Mehr Minschen in Neddersassen sünd verleden Johr in en Sportvereen ringahn. De Lanns-Sportbund hett vermellt: Gegen 2023 hebbt de Verene nu 49.000 Liddmaten mehr – dat sünd meist 2 Perzent. Tosamen sünd knapp 2,7 Millionen Lüüd in goot 9.000 Sportverene anmellt. De LSB hett bi Kinner un junge Lüüd bet 14 veer Perzent mehr tellt.

Dat Weer

Un woans süht dat mit dat Weer umto ut? Opstunns hebbt wi in Bremerhaven 9 Graad, in Bremen, Achem un Nordholt sünd dat 10 Graad. Vundaag blifft de Wulkendeek meist överall dicht, oplockern will dat nich so recht. Wenn de letzte Regen över de Noordsee aftrocken is, blifft dat dröög. Dat Thermometer krabbelt blots noch op köhlige 11 bet 13 Graad. De Wind dorto weiht flau oder en beten mehr, man mit deegte Böen, vun de noordwesten bet noorden Kant. Tokamen Nacht: dichte Wulken, eerst noch dröög, man denn fangt dat vun Süden her an to pladdern, un vör allen süüdlich un ööstlich vun Bremen kann ok deegten Regen daalkamen. Na de See hen blifft dat dröger. Bi 9 bet 7 Graad. An’n Stillen Fredag blievt de Wulken. Dat kann ok mal dröppeln, hier un dor ok wat länger, un an’n Vörmiddag ok wat mehr. Nich warmer as 10 bet 12 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jem Gabriele Intemann.