Plattdeutsche Nachrichten Plattdüütsche Narichten vun'n 16. April 2025

Striet wegen afghaansche Mitarbeiders geiht wieder

Berlin: De Frakschoonsvörsittersch vun de Grönen, Britta Haßelmann, hett sik achter den Plaan stellt, mehr Lüüd ut Afghanistan mit Charter-Flegers na Düütschland to bringen. De geschäftsföhren Bunnsregerung müss dat umsetten, wat se rechtlich toseggt harr, meen Haßelmann in’t ZDF-Morgenmagazin. Unions-Politikers harrn sik kloor gegen dat Utflegen stellt un seggt: De ne’e Bunnsregerung warrt düsse Programme en P vörsetten.

Mehr Geld för Pendler warrt bekriddelt

Berlin: Dat Umweltbunnsamt bekriddelt, dat dat Geld, wat Pendlers för de Fohrt na’n Arbeitsplatz vun de Stüer afsetten köönt, hoochsett warrn schall. Wat in den Koalitschoonsverdrag binnensteiht, dat weer nich goot för de Umwelt un dat Klima, un sozial ungerecht weer dat bavento, sä en Sprekersch vun de Behöörd. Vun Januar 2026 op an schall dat 38 Cent vun den eersten Kilometer an geven.

WHO-Staaten enig bi Pandemie-Kuntrakt

Genf: Enige Johren lang harrn de Liddmaten vun de Weltgesundheitsorganisatschoon verhannelt. Nu hebbt se sik op en Pandemie-Kuntrakt enigt. In Gang setten wüllt se dat bi de Johrsversammeln in’n Mai. So schall dat eenfacher warrn, Berichte ut de Forschung uttotuuschen, wenn dat dorüm geiht, Medizin un Impfmiddel to entwickeln. Wenn Süken utbreekt, wüllt se dat gau rutfinnen un wenn’t geiht gau wedder ut de Welt bringen. Dorför seggt de Länner to: Gesundheit schall en gröttere Rull spelen un Deerten schüllt beter överwacht warrn. Fief Johr is dat her, dat de Corona-Pandemie utbraken is. Dat weer de Utlöser för den Kuntrakt.

Gewarkschap is bang wegen Jobs bi Bremer Armaturen-Boer

Bremen: Dat se bi den Armaturenboer Gestra in Findörpp Jobs wegstrieken kunnen, dor wüllt de Mitarbeiders vunnamiddag mehr to weten. Op en Bedrievsversammeln snackt se över dat, wat de Mudderkonzern Spirax plaant. In de tokamen dree Johr wüllt se 90 Gestra-Lüüd aflohnen. Op lange Sicht schall in Bremen wegfallen, dat Metall to Spaan lüttmaakt warrt. Dat schüllt anner Warken mit övernehmen. De IG Metall is bang, de Bremer Fabrik mit 400 Mitarbeiders kunn heel un deel wegfallen.

Umbo vun de Stadthall Bremerhaven: Geld is dor

Bremerhaven: Wat de Stadthall eerstmal an Umbo plaant, kann se mit ehr egen Geld betahlen. Dat de Bedriev in de Twüschentiet wiederlopen kann, dorför bruukt se enige hunnertdusend Euro. Dat Geld hett de Stadthall extra trüchleggt, sä de Vörsitter vun den Opsichtsraat, Thorsten Raschen. Bet Sommer 2026 schull de Stadthall so eerstmal trechtkamen.

Dat Weer

Un woans süht dat mit dat Weer umto ut? Opstunns hebbt wi in Bremerhaven 14 Graad, in Bremen, Kneten un Rodenborg sünd dat 16 Graad. Vundaag: Eerst hell un kloor un dröög mit Sunnschien un en poor Wulkenplacken. An’n Namiddag treckt vun Süüdwesten her mehr un mehr Wulken rin, hier un dor kaamt Schuer daal, mag ween ok mit Blitz un Dunnerslag. Dat Thermometer krabbelt op warme 16 bet 19 Graad, op de Inseln 14 bet 15. De Wind dorto weiht flau, an de See ok mehr vun de süüdwesten Kant. An’n Namiddag dreiht he op Noordwest. Tokamen Nacht: dichte Wulken, un de smiet deegten Regen op us daal. Na de Elv to kann’t ok noch gewiddern. Bi 10 bet 7 Graad. Morgen: De Wulken blievt, an’n Morgen warrt de Regen weniger. An’n Namiddag meist överall dröög. Dat warrt köhliger mit blots noch 11 bet 13 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jem Sven Kuhnen.