Plattdeutsche Nachrichten Plattdüütsche Narichten vun'n 15. April 2025

Befragen vun SPD-Littmaten to’n Koalitschonsverdrag

Berlin – Siet Klock 8 an‘n Morrn sünd vundaag de knapp 360-dusend Partei-Littmaten vun de SPD opropen, över den Koalitschonsverdrag mit de Union aftostimmen. Darbi mööt tominnst 20 Perzent vun de Littmaten mitmaken, an’n Enn gellt de Mehrheit. Dat Afstimmen löppt twee Weken. De SPD-Böversten warvt för een „Jo“, ünner annern de Parteilinke un de junge Grupp, de Jusos, snackt sik dargegen ut.

Europa föhlt den Klimawannel dütlich

Genf – In Europa sünd in’t verleden Johr de höchsten Temperaturen in’n Dörsnitt meten worrn, siet dat överhaupt dat Weer optekend ward. In’n Vergliek to de Tied ahn Industrie is dat bold dree Graad wärmer worrn. Dat vermellt de EU-Klimawannel-Deenst Copernicus. Europa is de Kontinent, de an’n dullsten wärmer ward. Darbi gifft dat aver Ünnerschede: in’n Westen weer dat in’n Vergliek to natt, in’n Oosten dütlich to dröög.

Erste Tügen ward verhöört in’n Klette-Perzess

Celle – In’n Perzess gegen de ehemalig vermoden RAF-Terroristin Daniela Klette verhöört dat Gericht vundaag de ersten Tügen. Darunner ok den Fohrer vun een Geldtransporter, de in’n Juni 2015 in Stuhr överfullen worrn is. Damals is ok schaten worrn, de Staatsanwaltschupp seggt, dat weer versökter Moord. Klette ward buterdem versökter un utföhrter swarer Roov vörsmieten. Se schall woll mit annern Lüüd Geldtransporter un Inkoopsläden överfullen hebben, darmit se ehr Leven in’n Ünnergrund betahlen kann.

Landgericht Bremen fällt Urdeel in’n vermoden Moordperzess

Bremen – An’n Namiddag schall vör dat Landgericht dat Urdeel in’n Perzess üm een vermoden Moordversöök op den Osterholter Karkhoff fallen. Güstern harr de Staatsanwaltschupp foddert, dat de beid Anklagten för Johre achter de Trallen schüllt. De Ehelüüd ward vörsmieten, dat se den ehemalig Partner vun de Froo mit een Armbost un een Hammer angrepen hebbt. Darachter stickt een Striet üm dat Ümgangsrecht mit dat gemeensam Kind vun de Froo un dat Opfer.

Striet üm de Bimmelbahn op Juist

Juist – De Ratsbesluss vun dat Eiland Juist, een Bimmelbahn to köpen, de mit Diesel bedrieven ward, soorgt för Wedderstand. De Bahn schall Gäst vun un to’n Flegerhaben bringen. Een Grupp vun Lüüd vun dat Eiland lehnt dat af un will nu, dat dat een Börgerentscheed gifft. Denn bitnu föhrt op Juist keen Autos un so schall dat ok blieven, na Meen vun de Grupp. Toerst mutt aver de Verwaltungsutschuss pröfen, of de Andrag to’n Börgerentscheed överhaupt rechtens is.

Dat Weer

Un nu een Blick op dat Weer: op Wangerooge 12, in Bremen, Bremerhaben un Deefholt sünd dat opstunns 16 Graad. Hüüt schient blangen een paar lichten Wulken för een länger Tied de Sünn. An’n Abend ward de Wulken dicker un vör allens in’t Emsland un Ostfreesland kummt Schuers or Grummelschuers op – bi 21 bit 24 Graad in’t Binnenland un 16 bit 18 Graad op de Eilanden. Tokamen Nacht fallt ut dicken Wulken Schuers, to’n Deel ok Regen mit Blitz un Donner. To’n Morrn hen lockert dat denn wedder op. Dat Thermometer sackt op 12 bit 10 Graad. Morrn geiht de Dag erst fründlich un dröög los, an’n Namiddag ward de Wulken vun Südwesten her mehr un dicker un hier un dar fallt denn ok een beten Regen. Dat ward mit 17 bit 20 Graad nich mehr so warm. Op de Eilanden gifft dat 14 bit 15 Graad. Dat weern de Narichten op Platt. Michael Kück hett se tohoopstellt. Op platt trechtmaakt un vörleest hett se Heidi Jürgens.