Plattdeutsche Nachrichten Plattdüütsche Narichten vun'n 22. April 2025

Paapst Franziskus is na een Slaganfall sturven

Rom – Paapst Franziskus is na een Slaganfall sturven. Dat hett de Vatikan an’n Abend vermellt. Dat heet, de Slaganfall hett darto föhrt, dat sien Hart stahn blieven is. He hett aver ok noch anner Krankheiten hart. Franziskus weer güstern Morrn in sien Wahnung in’t vatikansche Gästhuus sturven. An’n Ostersünndag harr he noch den Segen „Urbi et Orbi“ spennt.

Truer op de hele Welt na den Dod vun’n Paapst

Berlin – Op de hele Welt is de Truer na den Dod vun Paapst Franziskus groot. Ok in Dütschland hebbt Politiker un Vertreder vun de Religionen darop antert. De Vörsitter vun de katholsche Bischopskunferenz, Bätzing, nöömte Franziskus een Geschenk för de katholsche Kark. Bunnespräsident Steinmeier sä, de Welt hett een lüchten Teken vun Toversicht verloorn. Noch-Bunneskanzler Scholz hett Franziskus as een Spreker vun de Swacken betekent.

Putin will Wapenroh för Ukraine pröfen, heet dat

Moskau – Kremlbaas Putin will den Vörslag vun de Ukraine för een Wapenroh, de 30 Daag anduern schall, pröfen. Dat hett he sülfst vermellt. Putin sä vör Journalisten, he will dat nich utslaten. He wiest sik darmit dat erste Mal na Johren open för een direktet Snacken mit de Regeern in Kiew. Vördem harr US-Präsident Trump künnig maakt, dat he bold nich mehr gedüllig sien ward un dat Snacken över den Freden beennen ward, wenn dat allens nich vörankaamt.

Streik to’n Wahrschaun in Neddersassen

Hannober – Fohrgäst in Bussen in Neddersassen mööt sik vundaag darop instellen, dat dar Verbinnungen utfallt. De Gewarkschupp Verdi hett bi een paar Busünnernehmen to een Streik to’n Wahrschaun opropen, de den helen Dag duern schall. Darachter stickt dat Verhanneln över de Tarife bi de Verkehrsbedrieve Neddersassen, de to’n Arbeitgeververband Nahverkehr, AVN, tohöört. Bedrapen sünd ünner annern de Kreise Rotenborg, Veern un Osterholt.

Bremer SPD hollt Raat över Koalitschonsverdrag

Bremen – Vun Klock 7 an’n Abend an dreept sik de Littmaten vun de SPD in de Hansestadt, üm över den Koalitschonsverdrag in’n Bund to snacken. Noch bit to’n Enn vun’n Maand köönt bunneswiet all SPD-Littmaten afstimmen, of se darmit inverstahn sünd. Börgermeister Bovenschulte hett sik all för den Koalitschonsverdrag utsnackt, de Bremer Jusos lehnt em aver af un foddert, dat wieter verhannelt ward.

Dat Weer

Un nu een Blick op dat Weer: op Wangerooge 9, in Bremerhaben 13, in Bremen un Deefholt sünd dat opstunns 14 Graad. Hüüt gifft dat een Mix vun velen Wulken un een beten Sünn, darto fallt af un an Schuers, kann ok Blitz un Donner mit darbi ween. An de Nordsee schient noch an’n ersten de Sünn, dar is dat meist ok dröög – bi 15 bit 17 Graad, an de See bi 12 bit 14 Graad. Tokamen Nacht treckt letzte Schuers un Grummelschuers gau af un dat lockert kort mal op. Dar kann Nevel optrecken, to’n Morrn hen ward dat wedder wulkiger. Dat Thermometer sackt op 8 bit 5 Graad. Morrn gifft dat wedder vele Wulken un blots een beten Sünn. De Dag fangt dröög an un denn kummt wedder nee’e Schuers op. An de Nordsee un Elv blifft dat meist dröög – bi 13 Graad op de Eilanden un 15 bit 18 Graad in’t Binnenland. Dat weern de Narichten op Platt. Michael Kück hett se tohoopstellt. Op platt trechtmaakt un vörleest hett se Heidi Jürgens.