Plattdeutsche Nachrichten Plattdüütsche Narichten vun'n 24. April 2025

US-Präsident Trump sanckt vun een Deal mit Russland in´t Ukrainekrieg

Kiew: Na ukrain`sche Angaven hett dat in de Nacht in de Hauptstadt düchtige russ`sche Attacken mit Drohnen un Raketen geven. Dorbi sünd tominnst 9 Minschen to Dode kamen un mehr as 70 sünd an´t Lief to Schaden kamen. Liekers dat de Angrepen stattfunnen hebbt,  seggt  US-Präsident Donald Trump, datt Russland praat is för een Enn vun den Ukraine–Krieg. He glöövt, datt dat eenen „Deal“ gifft, seggt Trump. Nu mutt man noch een Afkamen mit den ukrain`schen Präsidenten Wolodymyr Selenskyj drepen. De mutt nu tostimmen, dat he Flachen afgifft. Man Selenskyj hett all seggt, dat man nich op de Krim vertichten will.

Düütschland rekent in de Wirtschaft mit 0 Perzent Wassdoom

Berlin: De Bundes-Wirtschaftsminister Robert Habeck, de de Geschäften föhrt, stellt hütt Mittag de Fröhjohrsprognose vör. Ut Kreisen in de Regeerung heet dat, datt de Bundesregeerung in dütt  Johr, in de Wirtschaft, mit 0 Perzent Wassdoom rekent. Dorna sinkt woll de Exporte. Dormit de Wirtschaft wedder in Gang kummt will de swatt-roode Regeerung ok Verlichtern bi de Stüern inföhren. Buterdem schüllt de Energiepreisen sinken un se willt Milliarden Euro in de Infrastruktur steken.

In de Törkei beevt wieder de Eer

Istanbul: Rund üm de Millionenmetropol beevt de Eer wieder. An´t Avend hett dat wedder beevt. Gistern Middag weer , dat bit nu gröttste Beeven, mit een Starkde vun 6,2. De törkische Katastrophendeenst Afad hett, all tohoop, rund 185 Nabeeven tellt. Luut Gesundheitsministerium sünd dat bit nu 236 Minschen, de to Schaden kamen sünd. Dorvun 173 in Istanbul, de anneren in de Provinzen.

 Tonne schall woll de nee`e Wirtschaftsminister warrn

Hannover: Grant Hendrik Tonne, de bit nu SPD-Fraktionsvörsitter in´t Landdag is, schall de nee`e Wirtschaftsminister warrn. Dat hett de Ministerpräsident, de dat warrn schall, un de noch Wirtschaftsminister is, Olaf Lies, luut NDR-Informationen, bestimmt. An´t Middag will Lies, op een Pressekunferenz, sien besluten vörstellen. Olaf Lies schall an´t 20. Mai in´t Landdag to den nee`en Ministerpräsidenten wählt warrn. He folgt so Stephan Weil, de dat Amt nu noch hett. Weil harr vör dree Weeken seggt, dat he nich mehr will.

Trüchdenken an de Dodenmarschen vun KZ-Gefangenen hett an´t Bunker-Valentin anfungen

Bremen: An´t Bunker-Valentin in`t Stadtdeel Blomenthal hett een Gedenkmarsch, för mehrere Dage, anfungen. He geiht to dat fröhere NS-Kriegsgefangenenlager Sandborstel. An de 1.000 Minschen willt sik dormit an de Dodenmarschen vun KZ-Gefangenen vör 80 Johren besinnen. Mit dorbi sünd :  Schoolklassen, Firmas un Privaatlüüd. Bit Sünndag loopt se to Foot knapp 80 Kilometer. Dat is de Weg, op den de SS, kort vör Kriegsenn, noch dusende Gefangene, vun de Butenanlage vun`t KZ Neuengamme, dwungen harr.

Dat Weer

Un nu een Blick op dat Weer: In Rotenborg, in Bremerhaben un in Bremen 10, un Defhold sünd dat opstünns 11 Graad. Hütt hebbt wi den ganzen Dag vele Wulken an`t Heven, dor kummt veel Natt vun baven rünner. An´t Nomdag treckt sik de Regen den in´t Emsland, Ollenborger Münsterland un Ossenbrügger Land torügg. Vun de Elb un de Nordsee her warrt dat so´n beten fründlicher, bi 12 bit 17 Graad. Tokamen Nacht treckt de dichten Wulken den af, dor gifft dat blots noch luckere Wulken. Hier un dor mööt wi mit Nevel reken, bi 9 bit 4 Graad. Morrn fangt de Dag gries un mit Nevel an. Vun Middag an wesselt sik de Sünn un de Wulken af. An de Küst lacht us de Sünn meist länger an. Blots af un an mööt wie mit lütte Schuers reken. De Temperaturen liggt bi 11 bit 17 Graad. Sünnavend gifft dat mehr Sünn as Wulken und at blifft dröge,  bi 17 bit 20 Graad. Op de Eilannen hebbt wi 14 bit 16 Graad. Dat weren de Narichten op Platt. Tohoopstellt hett se Gabriele Intemann. Trechtmaakt un vörleest vun Antje Kruppa.