Plattdeutsche Nachrichten Plattdüütsche Narichten vun'n 20. Februar 2025

Trump mit Giftwöör gegen Selenskyj un de Ukraine

Washington: US-Präsident Donald Trump hett noch mal wedder giftige Wöör gegen den ukrainschen Präsident bruukt. In Miami meen he, Wolodymyr Selenskyj weer en Diktater, den keeneen wählt harr. Ok harr de Ukraine kene Rohstoffen levert, as Trump dat verlangt harr. Bunnskanzler Scholz sä, dat is leeg un ok verkehrt, wenn een seggt, Selenskyj stünn nich op demokraatschen Grund. Selenskyj sülvst is an’n Avend in sien Video-Naricht nich op Trump ingahn. Dorbi hett he kloormaakt: De Ukraine will wieder goot mit de USA tohooptoarbeiden.

Hannover: Verdi för mehr Geld op de Straat

Hannover: Op den Platz för de Minschenrechten kaamt opstunns de Mülllüüd tohoop. Wat dor achter stickt, is de Tarifstriet in den öffentlichen Deenst vun Bund un Kommunen. De Gewarkschap verdi hett överall in Düütschland Mitarbeiders vun Stadtwarken oder Müllbedrieven to Warnstreiks opropen. Morgen sünd de Verkehrsbedrieven an de Reeg. Denn fohrt ok in Bremen den ganzen Dag keen Bus un kene Bahn.

Bremen: Weniger Kursen för Flüchtlinge

Bremen: För Flüchtlinge gifft dat in de Stadtgemeend jümmers weniger Spraakkursen – ok wenn mehr un mehr Lüüd düsse Hölp bruukt. Wat fehlt, is dat Geld. So steiht dat in en Bericht för de Sozialdeputatschoon, de vundaag tohoopkummt. 2018 weren dat 66 Kursen, verleden Johr blots noch 38. Bremen gifft Johr för Johr sowat 450.000 Euro för Spraakkursen för Flüchtlinge ut. Energie, Lohn un Mietgeld is aver dürer worrn. Un ok de Bund gifft weniger Geld.

Langt dat Water? – Neddersassen richt sik op Klimawannel in

Cuxhaven: De Landkreis kriggt 600.000 Euro vun dat Land Neddersassen. Dat geiht um ne‘e Ideen, för noog Water to sorgen. So will dat Umweltministerium den Klimawannel wat gegenansetten. Ok de tokamen Generatschonen schullen noog rein Water hebben, un se schullen sik beter gegen Hoochwater un starken Regen bargen. Neddersassen gifft Geld för 24 Akschonen gegen deegten Regen un för noog Water. Dorför leggt dat Land sowat 4,6 Millionen Euro op‘n Disch.

Hoochhuus brennt in Willemshaven: Dree Minschen verletzt

Willemshaven: Wo dat in en Hoochhuus brennt hett, hebbt se fröh an’n Morgen dree Minschen vörsichtshalver na’t Krankenhuus brocht. Een weer sülvst ut sien Wahnung rutkamen, twee annern harr de Füerwehr över en Dreihledder rett. Dat Füer weer in de twete Etaasch in Gang kamen. De Füerwehrlüüd hebbt dat afwennen kunnt, dat dat Füer na anner Wahnungen röverlopen is. Sowat 25 Minschen sünd sülvst ut dat Huus rutkamen. De Polizei will nu rutkriegen, woso dat dor brennt hett.

Dat Weer

Un woans süht dat mit dat Weer umto ut? Opstunns hebbt wi in Bremen un Bremerhaven 1 Graad, in Cloppenborg un Neenborg sünd dat 2 Graad. Vundaag: Eerst Sunnschien mit blots en poor Wulken. An’n Middag un Namiddag treckt vun Westen her mehr Wulken rin, un an’n Avend fangt dat vun de Ems her an to pladdern. Dat Thermometer krabbelt op 6 bet 8 Graad. De Wind dorto weiht in Maten, an de See ok mal frisch un mit deegte Böen vun de süüdoosten Kant. Gegen Avend dreiht he op Süüd. Tokamen Nacht: De Wulken kruupt tohoop, un de Regen löppt vun’t Emsland wieder na Oosten to. Bet morgen fröh is dat aver meist överall wedder dröög. De Wulken blievt aver. Bi 6 bet 8 Graad. Morgen: Eerst dichte Wulken, de aver meist keen Regen op us daalsmiet. Pö a pö kriggt aver de Sunn de Bavenhand, un dat warrt hell un kloor. Gegen Avend wedder mehr Wulken. Dat Ganze bi 11 bet 15 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.