Plattdeutsche Nachrichten Plattdüütsche Narichten vun'n 28. Februar 2025

Union un SPD söökt vun hüüt op an Kurs

Berlin: Union un SPD kaamt vundaag dat eerste Mal tohoop, dat se över en ne’e Bunnsregerung snackt. Dat ARD-Hauptstadtstudio hett to weten kregen: Dat Söken na en Kurs geiht an’n Vörmiddag los. Beide Sieden schickt negen Lüüd. Eerst harr dat heten: Wegen de Landdagswahl in Hamborg an‘n Sünndag fangt se in Berlin eerst tokamen Week an. CDU-Baas Friedrich Merz un SPD-Top-Mann Lars Klingbeil hebbt denn aver fastleggt: Dat schall gauer losgahn. Merz harr anseggt: Bet Oostern schall de Koalitschoon trecht ween.

In'n Februar: En poor Minschen weniger ahn Arbeit

Nörnbarg: In’n Februar-Maand hebbt en poor weniger Lüüd kene Arbeit hatt. Dat hett de Bunnsagentur för Arbeit bekannt maakt. 2,99 Millionen Minschen harrn keen Job. Dat weren 3000 weniger as in’n Januar, man 175.000 mehr as een Johr vörher. För ganz Düütschland blifft de Quoot bi 6,4 Perzent. För dat Land Bremen hett de Arbeitsagentur en poor mehr Lüüd ahn Arbeit tellt. In Neddersassen hett sik meist gor nix ännert.

Selenskyj un Trump ünnerschrievt Kuntakt över Rohstoffen

Washington: US-Präsident Donald Trump begrött vundaag den ukrainschen Präsident Wolodimir Selenskyj. Trump seggt: Selenskyj warrt sien Naam unner en Kuntrakt över rore Eerden setten. De USA verlangt Rechten an de weertvullen Saken in den Unnergrund vun de Ukraine – för dat, wat se bet nu an Militärhölp geven hebbt. Güstern harr de US-Präsident mit den britschen Premier Keir Starmer doröver snackt, woans de Freden twüschen de Ukraine un Russland utsehn kann.

Bürgermeister-Smidt-Brüch: Rööd un Autos dröfft wedder fohren

Bremen: Veer Maand lang harrn se an de Bürgermeister-Smidt-Brüch in de Bremer Binnenstadt arbeidt. Nu is se to’n Deel wedder apen. Vun hüüt morgen op an köönt Lüüd to Foot, op’t Rad oder in’t Auto wedder över de Brüch kamen. Bussen un Stratenbahnen vun de BSAG un ok swore Lastwagen mööt jümmers noch en wieden Umweg fohren. Wat de Brüch överhaupt wedder kumplett freegeven warrt, dat mööt se noch uttesten, sä dat Amt för Straten un Verkehr. In enige Johren wüllt se de Brüch heel un deel ne boen.

Landgericht Veern: Oordeel wegen Moordserie vun en Suldaat

Veern: In den Perzess gegen en Mann, de in den Landkreis Rotenborg en Reeg Minschen umbrocht hett, rekent se hüüt Vörmiddag mit dat Oordeel. De Staatsafkateree seggt: De Suldaat hett dree utwussen Lüüd un een Kind dootmaakt, all Familie oder Bekannte vun sien fröhere Fro. Anklaag un Verteidigers verlangt: De Mann vun 33 Johr schall levenslang achter Trallen. Vör Gericht harr he togeven, dat he dat maakt hett.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven un Kneten 4 Graad, op Börkum sünd dat 5 Graad. Vundaag: Wulken bringt mehr un mehr Schuer mit. An’n Namiddag kummt vun de Noordsee sogoor de Sunn mal rut, vör allen in Oostfreesland. Dat Thermometer krabbelt op 4 bet 7 Graad. De Wind dorto weiht flau oder en beten mehr vun de noorden Kant, wenn’t schuert ok mit deegte Böen. Tokamen Nacht: De letzten Schuer treckt gau na Süden af. Denn blifft dat dröög, mit mal mehr, mal weniger Wulken, an de See ok kloor. Fröh an’n Morgen kann Daak oder hogen Daak opkamen. Bi 3 Graad över bet 1 Graad unner 0. Hier oder dor kann dat glatt warrn. Morgen: Eerst dakig oder gries un grimmelig. Eerst an’n Middag un Namiddag kann dat mal oplockern, denn kriegt wi ok de Sunn mal to sehn. Süüdlich vun Bremen blifft dat woll gries, aver dröög. Dat Ganze bi 6 bet 8 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Anja Guse.