Plattdeutsche Nachrichten Plattdüütsche Narichten vun'n 3. März 2025

Union wiest sik open för Sünnervermögen

Berlin – De Union will een wieteret Sünnervermögen för de Bunneswehr woll nicht utsluten. Fraktschonsviez Wadephul hett in’t Morrnmagazin vun ARD un ZDF andüüdt, dat de Union dütt Vörhebben noch in’n olen Bunnesdag ünnerstützen wöör. In’n nee’en Bunnesdag köönt AfD un Linke den Plaan mit ehr Stimmen ophollen. Üm dat mööglich nee’e Sünnervermögen ward dat vundaag woll ok bi de tweete Runn vun dat Snacken vun Union un SPD över een mööglich Koalitschon gahn.

SPD winnt Börgerschuppswahl in Hamborg

Hamborg – De SPD hett de Börgerschuppswahl wunnen, obschoons se dütlich Stimmen verloorn hett. De Partei vun Hamborgs Ersten Börgermeister Tschentscher hett na dat erste Ergevnis 33,5 Perzent vun de Stimmen kregen. Op Platz 2 kummt de CDU mit 19,8 Perzent, vör den Grönen mit 18,5. Darmit kann de rot-gröne Koalitschon wieterregeern. Tschentscher harr dat as sien Wunsch betekent, man he will liekers ok mit de CDU snacken.

6. Bremer Armootskunferenz snackt över‘t Klima

Bremen – De Tosamenhang twüschen Armoot un de slechte Laag vun’t Klima – darüm geiht dat bi de Bremer Armootskunferenz. De ward to’n sössten Mal vun Wohlfohrtsverbännen, Gewarkschuppen, Karken un de Arbeitnehmerkamer utricht. Rund 300 Littmaten ut Politik, Verwaltung un Wetenschupp wüllt daröver snacken, wat Bremen doon mutt, üm arme Minschen beter vör dat to schützen, wat wegen den Klimawannel nakümmt. Dat geiht darbi üm Wahnen, Verkehr, Eten un de Energiewenn.

Booarbeiden an de Bremer Stephaniebrügg fangt an

Bremen – De Stephaniebrügg is siet hüüt Morrn in beid Richten blots noch op een Spoor to befohrn. De Brügg mutt wedder heel maakt weern un dat Arbeiden daran schall bit Anfang April duern. Besünners to de Hauptverkehrstieden kann dat dardör längere Staus geven.

Anora winnt 5 Oscars

Los Angeles – Bi dat 97. Vergeven vun de Oscars hett de Tragikkomödie „Anora“ vun Sean Baker fief vun de wichtigst Filmpriesen vun de Welt kregen – ünner annern för den besten Film, de Regie un den Film-Text. Mikey Madison is buterdem as beste Hauptdarstellersche uttekent worrn. Den Pries för den besten Hauptdarsteller hett Adrien Brody för sien Rull in „De Brutalist“ kregen.

Dat Weer

Un nu een Blick op dat Weer: in Bremen un Deefholt 3, in Bremerhaben un op Wangerooge sünd dat opstunns 4 Graad. Nahden sik in de Fröh Nevel un Dunst oplööst hebbt, kummt vun de Nordsee her wedder nee’e, deepe Wulken op. Darvun af schient aver faken de Sünn bi blots een paar dünnen Wulken. Dat blifft dröög bi 7 bit 11 Graad. Tokamen Nacht ward dat erst meist licht wulkig or de Steerns funkelt. Later in de Nacht kummt Nevel op, dat regent aver nich. Ok an de Nordsee kann dat een beten totrecken. Dat Thermometer sackt op plus 4 bit plus 3 Graad op de Eilanden un plus 1 bit minus 3 Graad in’t Binnenland. Morrn fangt de Dag to’n Deel mit Nevel, to’n Deel mit Sünnschien an. Bit to’n Middag lööst sik de Wulken meist op, denn schient de Sünn. Regen fallt nich – bi 7 bit 12 Graad. Dat weern de Narichten op Platt. Irene Lottes hett se tohoopstellt. Op platt trechtmaakt un vörleest hett se Heidi Jürgens.