Plattdeutsche Nachrichten Plattdüütsche Narichten vun'n 24. Februar 2025

Union winnt Bunnsdagswahl

Berlin: De Union hett de Bunnsdagswahl mit 28,6 Perzent vun de Stimmen wunnen. Na dat Uttellen vun all Wahlkreisen kummt de AfD op 20,8 Perzent. De SPD is mit 16,4 Perzent so leeg as noch nie nich bi en Bunnsdagswahl wegkamen. De Grönen sünd op 11,6 Perzent kamen, de Linke op 8,8. BSW un FDP hebbt dorgegen de Fief-Perzent-Mark nich schafft.

Merz plaant dat Billen vun Regeern bet Oostern

Berlin: CDU-Baas Friedrich Merz hett an‘n Avend künnig maakt, datt he bet Oostern en Regeern billen will. En Twee’er-Maatschaft ut Union un SPD harr na de Tallen en Mehrheit. Blots mit de Grönen würr dat nich langen. En Maatschaft mit AfD un Linken hett Merz al vör de Wahl utslaten.

Fief Afordnete ut Bremen treckt in’n Bunnsdag

Bremen: Dat Land Bremen ward in’n nee wählten Bunnsdag mit fief Afordneten dorbi ween. Dat wiest de aktuellen Tallen vun de Bunnswahlleiterschen. SPD-Kandidaat Uwe Schmidt, CDU-Kandidaat Thomas Röwekamp un Grönen-Kandidaatsche Kirsten Kappert-Gonther treckt wedder in den Bunnsdag in. Vun de Linken is Doris Achelwilm dorbi, vun de AfD Sergej Minich.

Öffentlicher Deenst demonstreert in Bremerhaben

Bremerhaben: De Gewarkschaft verdi hett för hüüt wedder to’n Lawai för Wohrschau in’n öffentlichen Deenst opropen. In’n Noorden markt se dat ünner annern in Bremerhaben. Dor treckt de Mitarbeiders opstünns vun de Stadthüüs to’n Nee’en Haben. Dor schall dat Klock halvig twölf en Versammeln geven.

Doder Waal in’t Wattenmeer is verhungert

Wangerooge: De dode Buckelwaal, den se op dat Wattenmeer-Eiland Minsener Oog in’n Oosten vun Wangerooge funnen hebbt, is woll en Jungdeert, dat nich noog to freten kregen hett. Dat hett de Verwaltung vun’n Natschonaalpark Wattenmeer vermellt. Tovör hebbt Fachlüüd den Waal neger ünnersöökt. De Waal is en jung Manntje mit en Längde vun 7,40 Meter. Dat gifft Henwiesen, datt he toletzt blots vun sien Fettreserven leevt hett. En Helikopterpilot hett dat dode Deert an’n Dunnersdag funnen.

Dat Weer

Un nu en Blick op dat Weer: In Deefholt 10, in Bremen un Bremerhaben 11, un in Möppen sünd dat opstünns 12 Graad. Hüüt is dat hevenschattig, de Sünn hett meist keen Schangsen. Vun Oostfreesland un de Ems her kummt lichter Regen op, de ok mal länger anduert un an’n Namiddag bi de Aller un de Elv ankummt. An’n laten Avend ward de Regen vun de Ems her weniger. Dat Thermometer stiggt op 9 bet 13 Graad. In de Nacht treckt de Regen över dat Elv-Werser-Dreeeck to’n gröttsten Deel na Oosten af. Dat gifft aver wieterhen veele Wulken, de eerst to’n Morgen hen twüschen Werser un Ems hier un dor’n beten oplockert. De Temperaturen fallt op 8 bet 6 Graad. Morgen is dat bet to‘n Vörmiddag bi veele Wulken meisttiets dröög, Sünnschien gifft dat meist gor nich. An’n Middag un Namiddag lockert de Wulken vun de Nedderlannen her op, denn kummt de Sünn doch noch mal rut. An’n Avend gifft dat vun de Ems her wedder mehr Wulken. Dat kann ok mal Schuers geven bi 8 bet 12 Graad.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Marc Gelhart.