Plattdeutsche Nachrichten Plattdüütsche Narichten vun'n 25. Februar 2025

Verdi roppt to Lawai för Wohrschau op

Bremen: In Bremen hett de Warnstreik vun de Gewarkschaft Verdi Autwirkungen op dat Oppassen för de Kinner. Na Angaven vun de Gewarkschaft fallt in 15 Inrichtungen dat Oppassen kumplett ut. In de anneren Kitas gifft dat blots dat „Nood-Oppassen“. Ok sünd all Anstellten vun de BSAG to den Streik opropen. Dorüm föhrt hütt wedder keene Bussen un Bahnen. Twee grote Demonstrationstög treckt, siet den fröhen Vomdag, vun´t Hauptbahnhoff dör dat Viddel bit to´n Marktplatz. Dordör kann sik dat in den Stratenverkehr hentrecken.

SPD-Boss nömt Bedingungen för Verhanneln över en Koalitschoon

Berlin: Bit Oostern schall dat, na den Willen vun de CDU, eene nee`e Bunnsregerung geven. De Kanzler Friedrich Merz, de dat warrn schall, will dorför mit de SPD snacken. Man för de Sozialdemokraten is so een Bündnis noch nich so klaar. SPD-Boss Lars Klingbeil verlangt eenen beteren Ton in´t Ümgang mitnanner. Ok willt se betere Löhne för de arbeidende Midde, eene Rent, de stabil is un Geld in de Hand nehmen in Milliardenhööchde.

Weltsekerheitsrat verlangt dat Enn vun´t Ukraine- Krieg

New York: De UN-Sekerheitsrat hett för eene Ukraine-Resolution stimmt. Dormit hett man to´n eersten Mal överhaupt tohoop een Ordeel  to den Krieg dropen. Inbrocht hett de Resolution US-Präsident Donald Trump. In den Text is Russland nich as Aggressor nöömt.  Un ok dat de Russen ut de Ukraine rutgaht warrt nich verlangt, blots dat de Krieg gau to Enn geiht.

Schoolmesters besnackt sik över affragen vun Arbeidstied

Bremen: An de Schoolen in de Stadt Bremen kummt dat hütt to utfallen vun Ünnerricht. Grund dorför is een Personaalversammeln. An de 3.500 Lehrkräften un annere Anstellten sünd dorbi. Dat gröttste Thema is , wo man de Arbeidstied vun de Schoolmesters affragen kann. Een Stee för övereenkamen harr besloten, dat man de Arbeidstied in de Tokunft affragen mutt. De Bildungsbehöörd is aver jümmers noch dorgegen, un will den Beslutt dör den Senat upheven laten.

Reken mit Afslussreeden in Verrn`er Moordperzess

Verrn: In´t Moordperzess gegen en Suldaten vör´t Landgericht Verrn, willt se hütt mit de Opnahme vun Bewiesen afsluten. Achteran rekent man mit de Afslussreeden. De Staatsanwaltschaft smitt den Anklagten vör, dat he veer Minschen ut dat Ümfeld vun seine Ehefro, to de Tied, in Scheeßel un Bothel doot schaten hett. De Mann hett de Daad   vör Gericht togeven.

Dat Weer

Un nu een Blick op dat Weer: in Bremerhaven, in Bremen in Nenborg un in Emm sünd dat opstünns 8 Graad. Hütt hebbt wi vele Wulken an´t Heven. De Sünn kummt later af un an mal dör, hier un dor gifft dat mal een paar Schuers,  bi 11 bit 13 Graad. Tokamen Nacht treckt dichte Wulkenfeller op un wi mööt mit Nevel reken. Vun´t Emsland un Ollenborger Münsterland her kummt Regen op, bi 5 bit 3 Graad. Morrn kummt wedder Natt vun baven rünner. Vun Middag an lockert de Wulken vun de Ems her op. Un denn wesselt sik de Sünn un de Wulken af. Dat pieselt blots af un an mal. De Temperaturen liggt bi 6 bit 10 Graad. Dunnerstag dichte Wulken un Regen. To´n Nomdag hen is dat mehr dröge un de Sünn schient us an, bi 6 bit 9 Graad. Dat weren de Narichten op Platt. Tohoopstellt hett se Sven Kuhnen. Trechtmaakt un vörleest vun Antje Kruppa.