Plattdeutsche Nachrichten Plattdüütsche Narichten vun'n 26. Februar 2025

USA un Ukraine snacken enkelte Punkten to Rohstoff-Afkamen af

Kiew. De Ukraine is mit de USA op en Rohstoff-Afkamen övereens kamen. To sone Medien-Berichte hett dat Präsidialamt in Kiew de ARD tostimmt. Dat Afkamen süht vör, dat de Ukraine Mineralien an de USA levert. Un twor as Utgliek för US-Militärhölpen. Medienberichte vermellen, dat in den Vertragsvörslag kien Sekerheitsgarantien vun de USA stahn. Dat hett de Ukraine aver jümmer wedder kloor anseggt.

Breven un Paketen kamen wegen Warnstreiks later

Berlin. In den Tarifstriet vun den Staatsdeenst makt de Gewarkschop Verdi wieder Druck. Se hett för vundag de Mitarbeiters vun de Düütschen Post to en Warnstreik opropen – ok in Bremen un Neddersassen. In de Nacht hebbt de Mitarbeiters vun de Paketzentren in Bremen un Hannover as ok in dat Breefzentrum in Bremen de Arbeit liggen laten. De Warnstreik in de Nacht sorgt för bannig Maleschen. Dat vermellt Verdi. Paketen un Breven könen in de tokamen Daag later ankamen.

Kommunen bekriddeln Merz för Fasthollen an de Schuldenbrems

Ossenbrügge. De düütschen Kommunen bekriddeln, dat CDU-Baas Merz an de Schuldenbrems fasthollen will. De Bund för Steden un Gemenen verlangt, de Regeln bannig gau to ännern. Hauptgeschäftsbaas Berghegger see to de „Neje Ossenbrügger Zeitung“, dorbi geiht dat nich blots üm en Extrageld för Verdeffenderen, sünnern üm nödige Investitschonen in de Infastruktur. Merz harr güstern en gaue Reform vun de Schuldenbrems aflehnt.

Stadtbörgerschaft striedt över rünnerkamen Brüchen in de Binnenstadt vun Bremen

Bremen. De Stadtbörgerschaft hett över de rünnerkamen Brüchen in de Binnenstadt vun Bremen streden. CDU, FDP un Bündnis Düütschland smeten den Senat in en aktuell Stünn Nix-Doon vör un menen, dat dor heel un deel wat scheef lopen weer. Op Gegenwind stötten vör allen Plans för en Brüchenboogesellschop. Ut Sicht vun de Oppositschon sorgt dat blots dorför, dat sick dat unnödig lang hentreckt, man nich de Maleschen ut de Welt bringt.

Energiekonzern plant Solarpark op Asch-Mülllager in Wilhelmshaben

Wilhelmshaben. De Energiekonzern Uniper plant en 17 Megawatt Solarpark bi dat fröher Kohlekraftwark in Wilhelmshaben. Dat deelt dat Ünnernehmen op sien Internet-Siet mit. Mehr as 28.000 Solarmodule schüllt dorna in Tokunft op dat Asch-Mülllager in´n Norden vun de Stadt stahn. As dat Ünnernehmen vermellt, könen de rund 4.500 Huusholden een Johr lang mit Strom versorgen. De Solarpark schall in een Johr in Bedrief gahn.

Dat Weer

Un nu noch en Blick op dat Weer: In Cloppenborg fief, in Bremen-Mitt söss un in Bremerhaben un Borkum sünd dat opstunns veer Graad. Vundag is de Heven vull mit Wulken. Vun´t Ollenborger Münsterland un Ossenbrügger Land kaamt Regen. In´n Oostfreesland blifft dat man dröög. An´n Middag regent dat mehr un mehr in dat Landstück twüschen Weser und Elv. An´n Namddiag treckt de Regen wedder af. Achter den Regen kann mal de Sünn dör de Wulken kieken. Enkelte Schuer sünd man möglich. Söss bit thein Graad stahn denn op dat Thermometer. In de Nacht sünd nich mehr so vele Wulken an´n Heven. Dortwüschen kann man ok de Sterns sehn. Hier und dor kann Nevel opdükern. Vun de Nedderlannen trecken denn dichte Wulken op, de in dat Weser-Ems-Landstück Regen bringen. De Temeperaturen liggen bi twee bit fief Graad. Morn fangt dat mit Wulken un Regen an. An´n Vörmiddag treckt de Regen af, un af un an kiekt denn de Sünn dör de Wulken. Vun de Nedderlannen fangt dat denn man wedder an to pladdern. Grisselgrussel-Gewidder sünd ok möglich. Dat Thermometer wiest fief bit acht Graad.

Dat weern de Narichten op platt. Tohoopstellt hett se Anja Guse. Op Platt trechtmaakt un vörleest vun Markus Weise.