Plattdeutsche Nachrichten Plattdüütsche Narichten vun'n 4. März 2025

US-Präsident Trump sett Hölp för Ukraine ut

Washington – US-Präsident Trump hett all Militärhölp för de Ukraine utsett. As een paar amerikansche Medien vermellt, gellt dat ok för Wapen, de nu op’n Weg in de Ukraine sünd or de darop töövt, dat se wieter leevert ward. De Ukraine is bi dat Verdeffenderen gegen Russland hoochnödig op wietere Hölp anwiesen. De New York Times vermellt, dat schall erst wedder Hölp geven, wenn Trump sütt, dat de Ukraine sik to‘n Verhanneln över Freden mit Russland verplichten deit.

USA nimmt Tölle för Waren ut Mexiko un Kanada

Washington – De vun US-Präsident Trump ankünnigten Tölle för Waren ut Mexiko un Kanada gellt woll vun nu an – dat vermellt US-Medien. Nu draut een nordamerikanscher Hannelskrieg, wo de Folgen för de Weltwertschupp noch nich klaar sünd. Kanadas Premier Trudeau harr all ankünnigt, dar wat gegen to setten. Kanada will nu ok Tölle in Höögde vun 25 Perzent op US-Waren inföhren. Ok twüschen den USA un China gifft dat nee’en Striet. China will mit Gegentöllen op US-Waren antern.

Polizei ünnersöökt Dodesfohrt in Mannheim

Mannheim – Na de Dodesfohrt in de Binnenstadt vun Mannheim geiht de Polizei nich darvun ut, dat dar politische Grünne achter stickt. Ok een Terroranslag ward utsloten. Toerst weer dat nich klaar, woso de 40-Jöhrige an’n Mondag mit een Auto in de Footgängerzoon rast weer. De Staatsanwalt vermellt, dat he woll psychisch krank is. Dat sütt so ut, dat de Kierl Minschen ümbringen wull. Gegen em ward wegen tweefack Moord un mehrfack versöökten Moord ermiddelt.

Minschen ward jümmer dicker

Melbourne – Een australisch Forschungssteed hett rutfunnen, dat in 25 Johren rund een Drüddel vun all Kinnern un jungen Minschen op de hele Welt to dick sien ward. De Forscher rekent darmit, dat de meisten Minschen mit toveel Fett an’t Liev in’n Öller twüschen fief un 24 Johren in Nordafrika un in’n Oosten Blangenbi, as ok in Lateinamerika un in de Karibik leevt. In Dütschland köönt darna 20 bit 23 Perzent vun de jungen Lüüd bedrapen sien. Darachter stickt to’n Bispill dat in düsse Tieden anners eten ward.

Bremen mutt för Darlehen vun’n Jaa-Werser-Haben sporen

Bremen – Üm dat Lock in de Kass bi’n Jaa-Werser-Haben in Wilhelmshaben to stoppen, mööt all Flachs vun de Bremer Verwaltung sporen. Bremen will een Grootdeel vun de mehr as 62 Millionen Euro, de se trüchtahlen mööt, över een Ümlaag betahlen. Blangen Bremen mutt Neddersassen as tweeter Gesellschupper jüst so veel tahlen. Dat Land hett dat aver all inplaant. Dat Trüchtahlen vun dat Darlehen steiht nöchstet Johr an. Ut de Innahmen vun’n Jaa-Werser-Haben is dat aver nich to stemmen.

Dat Weer

Un nu een Blick op dat Weer: in Bremen, Bremerhaben, Deefholt un op Wangerooge överall sünd dat opstunns 4 Graad. Wo noch Nevel un hoger Nevel to seen is, lööst he sik bit to’n Middag op, denn schient egens överall de Sünn. Dar sünd meist keen Wulken ünnerwegens, man vör allens an de Küst kann dat länger gries blieven. Regen fallt nich – bi 7 bit 12 Graad. Tokamen Nacht is de Heben meist klaar, een paar dünne Wulken köönt ünnerwegens sien un dat blifft dröög. Dat Thermometer sackt op plus 3 Graad op de Eilanden un plus 2 bit minus 2 Graad in’t Binnenland. Morrn schient de Sünn vun fröh bit laat. Wo noch Nevel is, treckt he gau af. Regen fallt wieter nich - bi 9 bit 14 Graad. Dat weern de Narichten op Platt. Sven Weingärtner hett se tohoopstellt. Op platt trechtmaakt un vörleest hett se Heidi Jürgens.