Plattdeutsche Nachrichten Plattdüütsche Narichten vun'n 5. März 2025

US-Präsident Trump deelt den Kongress in twee Lager mit sien Reed

Washington. Klatschen op de en Siet in den Kongress, luutstarke Protest op de anner Siet. US-Präsident Donald Trump överschüdd sick bi sien Optritt vör beiden Kamern vun den Kongress mit Egenloff un stell sick achter sien betto Doon in sien Amt. As to´n Bispill dat Utspreken vun Straaftöll un dat op de Straat setten vun velen Lüüd, de in´n Staatsdeenst weern. Na den open Striet in dat Witte Huus mit den ukrainisch Präsdidenten Wolodymyr Selenskyj düüd he en openanner Tokamen twüschen beiden Staaten an. Trump weet dat woll ut en Breef vun Selenskyj. Dorin steiht, dat de Ukraine praat weer, en Rohstoffafkamen to ünnerschrieven un an en Freden op Duer to arbeiten.

Arabisch Staaten weern för den Plaan vun Ägypten för Gaza

Kairo. Arabisch Staats- un Regerungsböverste hebbt bi en Drapen in Kairo en ägyptisch Nakriegsplan för den Gazastriepen tostimmt. De Wedderopbo kost dorna 53 Milliarden Dollar. De op fief Johr anleggte Plaan steiht as Wedderpart to de Vision „Riveria vun den Oosten Blangenbi“ vun US-Präsident Donald Trump. Trump sien Vörslag weer vun de arabisch Siet scharp bekriddelt wurren. Ünner annern, wiel he en Umtog vun de Inwohners verlangt. Ägyptens Plaan süht dorgegen bannig veel Geld för Infrastruktur un Wohnungsbo vör, dorünner en Haven, Strandhotels un en Flegerhaven.

Forschers ut de Wirtschaft löövt Milliarden-Finanzpaket vun SPD un Union

Berlin. Dat Övereenkamen vun Union un SPD op en milliardensworet Geldpaket stött bi de böversten Forschers ut de Wirtschaft op Tostimmen. Jens Südekum vun de Heinrich-Heine-Universität Düsseldörp nööm dat en „Gamechanger“. Also en „Speelverännerer“. Wenn dat so klappt, draff de Stillstand vun de düütschen Wirtschaft nu gau överwunnen ween, see Sebastian Dullien vun dat Institut för Makroökonomie un Konjunkturforschung dorto. Dat Övereenkamen süht vör, dat all Kosten för dat Verdeffenderen över een Prozent vun dat Bruttobinnenlandprodukt bi en Bereken vun de Schuldenbrems utnahmen weern. Bavento schall en nejet Extrageld vun 500 Milliarden Euro för Infrastrukturen inricht weern.

Polizei finnt 280 Kilogramm Kokain bi Razzia in´n Haven vun Broak

Broak. In´n Haven vun Broak in´n Landkreis Wesermarsch wurren bi en Razzia 280 Kilogramm Kokain sekerstellt. Transportert wurren de Drogen in den Rump vun en Frachtschipp ut Süüdamerika. De Smugglers, de dat woll ween sünd, hett de Polizei in den Haven un dicht bi direktemang bi dat Smuggeln tofaat kregen. Dat see en Sprekersche vun de Zentralen Kriminalinspektschoon Ollenborg. Dat passeer, as dree vun de söss Smugglers as Dükers de Kokainpaketen ut den Rump vun den Frachtschipp ruthalen un an Land bringen wullen.

Zentrum för Deepseeforschen warrt in Bremen inwieht

Bremen. An´n Middag warrt in Bremen dat Zentrum för Deepseeforschen inwieht. De Steed is in en egen, nejen Huus an de Uni Bremen anboot. Forschungsswoorpunkt schall de Rull vun de Ozeane un de Deepsee bi Klimaverännern ween. De Bokosten liggen bi rund 50 Millionen Euro. Dorvun hett de Bund knapp 19 Millionen drogen.

Dat Weer

Un nu noch en Blick op dat Weer: In Grotenkneten, in Bremen-Mitt un in Bremerhaben fief un in Hooksiel sünd dat opstunns söss Graad. Vundag lacht den ganzen Dag de Sünn vun´n Heven. Viellicht is mal en dünne Wulk to sehn. Bit to´n Avend schient de Sünn man thein bit elven Stünnen un dat blifft dröög. De Wind weiht en beten bit in Maten. Thein bit 15 Graad stahn denn op dat Thermometer. In de Nacht sünd kien Wulken an´n Heven un dat blifft dröög. Hier un dor gifft dat mal en dünne Wulk. De Temperaturen liggen bi minus een bit plus veer Graad. Morn schient na Fröhnevel meist överall de Sünn. Wulken sünd nich an´n Heven un dat blifft dröög. In´n Dagsverloop dükern en poor dünne Wulken op. Dat Thermometer wiest thein bit 17 Graad. Dat weern de Narichten op platt. Tohoopstellt hett se Sven Weingärtner. Op Platt trechtmaakt un vörleest vun Markus Weise.