Plattdeutsche Nachrichten Plattdüütsche Narichten vun'n 27. Februar 2025

Andrag, de AfD to verbeden, eerstmal vun’n Disch

Berlin: Afgeordnete vun mehrere Parteien nehmt eerstmal den Andrag vun’n Disch, de AfD to verbeden. Den Andrag harr de Bunnsdag in de eerste Lesung besnackt un an den Binnenutschuss schickt. Vun dor is de Saakt aver nich to’n Afstimmen in den Bunnsdag trüchschickt worrn. In den neen Bunnsdag sitt de AfD mit 152 Afgeordnete. Se sünd de tweetgröttste Frakschoon.

Trump begrött den britschen Premier Starmer in’t Witte Huus

Washington: De britsche Premierminister Keir Starmer fleegt vundaag na Washington. In’t Witte Huus kummt he mit US-Präsident Donald Trump tohoop. Bavenan steiht de Fraag: Woans geiht dat wieder mit de Hölp för de Ukraine. In blots en poor Daag is Starmer al de twete grote Politiker ut Europa, de Trump besöcht. Maandag weer de franzöösche Staatspräsident Emmanuel Macron in’t Witte Huus. Ok he hett mit Trump över den Krieg twüschen Russland un de Ukraine snackt.

Hamas gifft mehr Lieken rut

Gaza: In’t Gazaland hett de islamistische Hamas noch mal veer dode israelsche Geiseln an dat Rode Krüüz rutgeven. Dorför hett Israel mehr as 600 Palästinensers ut’t Kaschott rutlaten. Düsse Uttuusch höör to en Afkamen doröver, dat se dor mit’t Scheten ophöört. De Kuntrakt löppt an’t Wekenenn ut. Noch is nich kloor, wat he wiederlöppt oder nich.

Verdi: mehr Warnstreiks bi de Post

Bremen: Vele Breevkassen blievt vundaag woll leddig. De Gewarkschap Verdi maakt mehr Warnstreiks bi de Post. An vele Steden överall in Düütschland schüllt de Postbüdels jemehr Arbeit liggen laten. Dat gellt ok för de Stadt Bremen, man nich för Walle, Gröpeln un Bremen-Nord. Un ok nich för Bremerhaven. In Neddersassen löppt de Streik in Syke, Weyhe, Sulingen, Bassen un Brooksen-Vilsen.

Mehr Geld för Erzieherinnen un Erziehers an Bremerhavener Grundscholen

Bremerhaven: Erzieherinnen un Erziehers an Grundscholen kriegt mehr Geld. Dat hett de Magistrat fastleggt. De Regel gellt naderhand vun Juli 2022 op an. Lüüd, de an Grundscholen arbeidt, warrt nu just so betahlt as Lüüd in Kitas, de in Koppels arbeidt, de mehr Stütt bruukt.

Dat Weer

Un woans süht dat mit dat Weer umto ut? Opstunns hebbt wi in Bremerhaven 5 Graad, in Bremen, Deefholt un Weyerbarg sünd dat 6 Graad. Vundaag: Eerst Wulken, un pladdern kann dat ok. Bet Middag is de Regen aver twüschen Werser un Elv aftrocken. Achteran lacht us ok mal de Sunn. Man vun Westen her kummt gau en Reeg Schuer na. Dat kann deegt regen, ok mit Grisselgrussel. Dat Thermometer krabbelt op 5 bet 8 Graad. De Wind dorto weiht flau oder en beten mehr vun de süden bet süüdwesten Kant, wenn’t schuert oder gewiddert ok mit deegte Böen. Gegen Avend weniger Wind. Tokamen Nacht schuuvt sik vele Wulken över den Heven. De Steerns kriegt wi blots af un an mal to sehn, dorför treckt Schuer dör. Hier un dor kann Daak opkamen. Bi 4 bet 1 Graad. Morgen: Dichte Wulken, un de smiet mehr Natts vun baven. An’n Namiddag vun de Noordsee her wat dröger, hier un dor waagt sik sogoor de Sunn rut. Dat Ganze bi 4 bet 7 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Irene Lottes.