Plattdeutsche Nachrichten Plattdüütsche Narichten vun'n 06. März 2025

Post will dusende Steeden strieken

Bonn: De Post will bunnswiet bet Enn vun düt Johr 8.000 Steeden strieken. Dat hett dat Ünnernehmen hüüt morgen künnig maakt. Dorna schüllt Jobs in dat Breef- un Pakeetrebeet wegfallen,opstunns arbeiden dor rund 187.000 Minschen. De Post will na eegen Angaav so um un bi een Milliarde Euro inspoorn.

Mitarbeiters vun Kranken- un Pleeghüüs streiken

Berlin: Bunnswiet streiken hüüt Arbeiders vun Kranken- un Pleeghüüs. Dor achter steekt Tarifverhanneln in den apen Deenst vun Bund un Kommunen. Ok in Bremen un Neddersassen sünd Krankenhüüs bedrapen – de Bedriev löppt verknappt – Nootfäll warrt aver behannelt.

SPD-Baas sluut Grenzen dicht maken ut

Berlin: SPD-Baas Lars Klingbeil hett sik gegen dichtmaken vun Grenzen utspraken. Bi de ARD-Sennung „Maischberger“ un ehrder he wedder mit de Union tohoop sitt, see he: dat is woll natschonaal nich to maken un europääsch unklook. In en Tiet, in de de Antwurt op US-Präsident Trump en stark Europa ween mutt, kann dat stärkste Land Europas nich de Grenzen dicht maken. CDU-Baas Friedrich Merz hett künnig maakt, as Bunnskanzler dat Binnenministerium Order to geven, all illegaal inreisen Minschen torüchtowiesen.

Maskeerte trecken dör dat Veertel un stecken Affallammer in Brand

Bremen: In dat Bremer Veertel hett güstern Avend en Grupp vun bet to 40 Lüüd, ünner annern Affallammer un Müll ansteken, bericht de Polizei. Polizei, Füerwehr un de Straatenreinmakaree harrn dormit to doon all Brandresten wegtorümen. Dorum kunnen för korte Tiet kien Bussen un Bahnen fohren. Of de Grupp de linke Szeen tohöört, mutt nu de Polizei rutkriegen. Op de Straat weren woll Antifa-Floogbläder verstreut.

Rederee Frisia stellt eersten Elektro-Katamaran vör

Norden: De Redeere Norden-Frisia will Klock 11 den eersten Elektro-Katamaran ünner düütsche Flagg vörstellen. Dat rein elektrisch bedrieven Fährschipp schall vun April af an twuschen Noorddiek un de ostfreesche Insel Norderney föhren. De E-Katamaran hett Platz för 150 Fohrgäst un schall 30 Minuten för en Streek bruken, bericht de Rederee. Wieder maakt se künnig, dat de Stroom vun Photovoltaikanlagen kaamt, de op dat Dack vun Parkflachen an den Haven vun Noorddiek anbrocht wurrn.

Dat Weer

Un nu kiekt wi op dat Weer: In Möppen hebbt wi 4 Graad, in Bremen, in Bremerhoben un Emm sünd dat opstunns 6 Graad. Hüüt lacht de Sünn un dat blifft dröög. An Namiddag trecken vun de Nedderlann un dat Münsterland hooge Wulkenfeller op, liekers blifft dat fründlich. Dat Thermometer wiest us 10 bet 12Graad op de Eilannen un 14 bet 17 Graad in´t Binnenland. In de Nacht blinkern de Steerns af un an schuven sik mal hooge Wulkenfeller dör, man dat blifft dröög bi 6 Graad op de Eilannen un 5 bet 1 Graad in´t Binnenland. Morgen eerst en beten daakig, achterna veel Sünnenschien, meist blots en poor lütte Wulken, wiederhen dröög bi 15 bet 18 Graad in´t Binnenland un 11 bet 13 Graad op de Eilannen.

Dat weren de Plattdüütschen Narichten. Tohoopstellt vun Katrin Martens. Op platt torechtmaakt un vörleest vun Martina Brünjes.