Plattdeutsche Nachrichten Plattdüütsche Narichten vun'n 07. März 2025

Europääsch Union eenigt sik op massiv Oprüsten

Brüssel: De Europääsch Union will massiv Oprüsten. Op en Noottopdrepen hebbt de 27 EU Staaten den Weg dorför meist freemaakt. Kommischonsbaassche von der Leyen harr dat vörslaan, nu schüllt kunkrete Plaans nakamen. All tohoop schüllt betto 800 Milliarden Euro mobiliseert warrn. Von der Leyen will de EU-Schullengrenz locker maken, üm natschonaale Verteidigungsutgaven hööger to setten.

Ukraine: Fredensverhanneln in Saudi-Arabien plaant

Washington: Tokamen Week wüllt de Ukraine un de USA över möögliche Freedensvereenboren mit Russland verhanneln. De Drepen sünd dorna in Saudi-Arabien plaant. Na US-Angaav schüllt över Rahmenplaans för en Afkamen un en eerste Wapenroh snackt warrn. De ukrainsche Präsident Wolodymyr Selenskyj maakt künnig, an Maandag sülvst antoreisen, üm mit den saudi-araabschen Kroonprinzen to snacken.

Wiedere Wohrschaustreiks in den apen Deenst

Bremen: In den Tarifstriet vun den apen Deenst gaht de Wohrschaustreiks wieder. De Gewarkschop Verdi hett in Bremen un Neddersassen för hüüt all Mitarbeiders vun Kitas un de Sotschalarbeit opropen de Arbeit rohn to laaten. Man ok in en poor kommunalen Krankenhüüs warrt wedder streikt. De Gewarkschop verlangt dat Hoochsetten vun den Tarif üm acht Perzent. Vun Arbeitgeversiet gifft dat noch kien Anbott.

Levensmiddel-Kontrolleure stellt mehr Mängel fast

Bremen: In dat Land Bremen hebbt Levensmiddel-Kontrolleure verleden Johr düütlich mehr Mängel faststellt. In 819 Bedrieven harrn se, na de Gesundheitsbehöörd, wat to moneren. Dat Johr dorvör weren dat noch 130 Bedrieve minner. Meist seen de Kontrolleure wat gegen fehlen Angaav över Tosatzstoffen or bekriddelt de Hygieen. All tohoop geev dat rund 4200 Levensmiddelkuntrollen in´t Land – nich blots in Gasthüüs un Happenboden, ok in Geschäften un Ünnernehmen, de Levensmiddel produzeren.

Froens in dat Land Bremen kriegt jümmers noch weniger Geld as Mannslüüd

Bremen: Froens in dat Land Bremen hebbt verleden Johr binah fief Euro minner per Stünn verdeent as Mannslüüd. Düsse Tahlen hett dat statistisch Lannsamt hüüt an den „Equal Pay Day“ vörleggt. De Gender Pay Gap – also de Lohnlock twuschen Kerls un Froensminschen – is aver en beten lütter worrn. Wieldess Mannslüüd 26,50 Euro per Stünn verdeent, weren dat bi Froens knapp 22 Euro.

Dat Weer

Un nu kiekt wi op dat Weer: In Möppen hebbt wi 6 Graad, in Bremen 8 Graad, in Bremerhoben un Emm sünd dat opstunns 9 Graad. Hüüt lacht de Sünn un dat blifft dröög. An Namiddag trecken vun de Nedderlann un dat Ossenbrügger Land middel bet hooge Wulkenfeller op, liekers blifft dat fründlich. Dat Thermometer wiest us 15 bet 19 Graad in´t Binnenland un 12 bet 14 Graad op de Eilannen. In de Nacht trecken wiederhen middel bet hooge Wulkenfeller dör, dortwuschen köönt wi de Steerns funkeln sehen, an Morgen kann dat en beten daakig warrn un dat bi 6 Graad op de Eilannen un 5 bet 0 Graad in´t Binnenland. Sünnavend lööst sik de Daak gau op un överall lacht de Sünn, man en poor lütte Wulken sünd ok dorbi, dat blifft dröög bi 15 bet 19 Graad in´t Binnenland un 12 bet 14 Graad op de Eilannen. Sünndag eerst wedder en beten daakig achteran Sünnenschien, af un an en poor lütte Wulken wedder blifft dat dröög bi 11 bet 17 Graad.

Dat weren de Plattdüütschen Narichten. Tohoopstellt vun Katrin Martens. Op platt torechtmaakt un vörleest vun Martina Brünjes.