Plattdeutsche Nachrichten Plattdüütsche Narichten vun'n 21. Februar 2025

BSAG: Warnstreik löppt 24 Stunnen

Bremen: In de Stadt fohrt vundaag keen Bus un kene Bahn vun de BSAG. Wat dor achter stickt, is en Warnstreik vun de Gewarkschap Verdi. De schall noch bet morgen wiederlopen. Wo dat in München en Terroranslag op en Verdi-Oploop geven harr, wüllt de Demonstranten nu nich dör de Straten lopen. In enige Bunnslänner löppt vundaag keen Verkehr na dichtbi, so ok in Neddersassen. Verdi will de Arbeitgevers Damp maken, wo se jüst över de Tarifen in den öffentlichen Deenst verhannelt.

Netanjahu: Armee-Akschonen in’t Westjordanland

Tel Aviv: Wo dicht bi de israelsche Hauptstadt in dree Bussen Bomben hoochgahn sünd, hett Ministerpräsident Netanjahu anseggt: Nu gaht de Suldaten noch knapphanniger vör gegen den Terror in’t Westjordanland. Vörnehmen warrt sik de Militärs Gegenden, in de de Terror to Huus is, heet dat in de Sozialen Medien. Güstern Avend weren dree Sprengladungen in de Luft gahn, noch twee Bomben hebbt se to rechter Tiet unschädlich maken kunnt. Nüms is dorbi to Schaden kamen.

Weniger Schiet in de Noord- un Oostsee

Cuxhaven: In de Noord- un de Oostsee hebbt se verleden Johr weniger Öölplacken un annern Dreck funnen as in de Johren vörher. Dat stellt dat Haveree-Kommando Cuxhaven fast. Rein vun de Tallen her, sünd se eenmal in elven Stunnen giftigen Kraam wiesworrn. In de eersten Johren vun dat Ööl-Opspören weer dat meist dreemal so veel. In de Noordsee hebbt se mehr Schiet un Dreck funnen as in de Oostsee.

Tempo 30 överall an’n Osterdiek – dat duert noch

Bremen: Dat Tempo 30 överall op den Osterdiek gellt, dat duert noch wat. Egens wull dat Mobilitätsressort dat güstern bekannt maken. Man in de tostännige Deputatschoon hett en Mann ut’t Amt seggt, se wüllt eerstmal de März-Sitten vun den Bunnsraat aftöven. Dor wüllt de Länner doröver snacken, dat se de Stratenverkehrs-Ordnung umschrievt. Dat heet denn ok: Dat warrt eenfacher, Quarteren mit Tempo 30 intorichten.

Football-Bunnsliga: Werder mutt an’n Avend gegen Freeborg ran

Freeborg: De 23. Speeldag in de Football-Bunnsliga geiht vunavend los mit FC Freeborg gegen Werder Bremen. Freeborg harr toletzt en Reeg Spele wunnen. Wo Werder dat Speel to Huus gegen Hoffenheim in’n Sand sett hett, sünd se nu in de Kniep. In de letzten söven Spelen hebbt se blots eenmal wunnen. Los geiht dat Klock halvig negen.

Dat Weer

Un woans süht dat mit dat Weer umto ut? Opstunns hebbt wi in Cuxhaven 7 Graad, in Achem sünd dat 8 un in Bremen un Bremerhaven 9 Graad. Vundaag: Mal mehr, mal weniger Wulken, meisttiets dröög. Drübbeln will dat blots af un an mal. Hier un dor waagt sik ok de Sunn mal rut. Dat kann ok mal en Tietlang hell un kloor blieven. Kloor warmer as de letzten Daag. Dat Thermometer krabbelt op 11 bet 16 Graad. De Wind dorto weiht flau oder en beten mehr, eerst vun de süden Kant, an’n Avend dreiht he op Süüdoost. Tokamen Nacht köönt wi den Maand un de Steerns bekieken. Af un an treckt Wulken dör. Na Middernacht warrt de depen Wulkenplacken mehr. Dat blifft aver dröög. Bi 8 bet 5 Graad. Morgen: Eerst dröög, un ööstlich vun de Werser lacht us ok de Sunn. Westlich mehr Wulken, de sik pö a pö na de Lümborger Heid röverschuuvt. Vun’t Emsland bet Oostfreesland drübbelt dat al an’n Vörmiddag, de Regen kummt an’n Avend bet na de Jaad. Dat Ganze bi 10 bet 15 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Kück.